Дубайга бир марта бўлса ҳам ташриф буюрган сайёҳ яхши билади: бу ерда шарқона ҳашамат энг сўнгги технологиялар билан уйғунлашган. Бу ҳатто шаҳар полициясининг автомобиль паркини ҳам четлаб ўтмаган. Автодром ёки музейларда сақланадиган қимматбаҳо автомобилларни Дубайнинг оддий йўл қатнов жойларида кўриш мумкин.
Rolls-Royce Cullinan Mansory
Бу дабдабали автомобиль асосан оппоқ рангда учрайди. Унинг кузовида яшил рангли чизиқлар автомобилнинг полицияга тегишли эканини билдиради.
Техник кўрсаткичлари бир оз фарқ қилади: 12 цилиндрли, икки турбинали двигатель 610 от кучи ишлаб чиқаради. Бу деярли Cullinan Black Badge модели билан бир хил, бироқ максимал тезлик 250 дан 280 км/соатга оширилган.
Mercedes-AMG GТ 63 С
Ушбу тўрт эшикли спорткар ажойиб дизайн ва қулайликни ўзида бирлаштиради. 4 литрли, V8, икки турбинали мотор 639 от кучига эга. Ушбу машина 0 дан 100 км/соат тезликка атиги 3,2 сонияда чиқади.
Aston Martin Оnе-77
Модель номидаги “77” тасодифий эмас: бу автомобилнинг атиги 77 дона ишлаб чиқарилганини англатади. Улардан бири эса айнан Дубай полициясига тегишли. 7,3 литрли, 750 от кучига эга В12 двигателли Aston Martin Оnе-77 350 км/соатдан юқори тезликка чиқади.
Ford F-150 Raptor
Ушбу махсус пикапдан шаҳар полицияси суперкарларининг кучи етмаган жойларда фойдаланади. Йўлтанламас Ford F-150 Raptor 450 от кучига эга, 3,5 литрли V6 EcoBoost двигатели билан жиҳозланган бўлиб, чўл шароитида бемалол ҳаракатлана олади.
Tesla Cybertruck
Бу электрокарни Чеченистон раҳбари уни сотиб олганидан сўнг, Дубай полицияси ҳам орқада қолмади. Мустаҳкам пўлатдан ишланган кузов ва футуристик дизайнга эга Tesla Cybertruck 200 км/соатдан юқори тезликка чиқади.
Bugatti Veyron
Дубай полицияси ушбу гиперкардан 2014 йилда фойдаланишни бошлаган. Унинг максимал тезлиги — 407 км/соат. Нархи 1,5 миллион евродан юқори бўлган бу автомобиль асосан реклама кампаниялари ёки расмий тадбирлар учун ишлатилади. Bugatti Veyron ҳали-ҳануз дунёдаги энг тез полиция машиналаридан бири ҳисобланади.
Булар Дубайга нима учун керак?
Бу савол кўпчиликни қизиқтиради, лекин шуни унутмаслик керак: Дубай — брендга айланган шаҳар. Суперкарларга сармоя киритиш ҳашаматли ҳаёт тарзини реклама қилиш билан бирга, кучли маркетинг стратегияси ҳамдир. Бундай эксклюзив автомобиллар туфайли Дубай полицияси дунё миқёсида янада танила бошлаган.
Изоҳ (0)