Work and Travel дастури орқали Германияга борган ва қийин молиявий аҳволда қолган Қорақалпоқ давлат университетининг 14 нафар талабасига амалий ёрдам кўрсатилди. Бу ҳақда “Дунё” ахборот агентлиги хабар бермоқда.
Маълум қилинишича, талабалар ташкилий масалаларда йўл қўйилган баъзи камчиликлар сабабли сафарнинг биринчи кунидан режалаштирилган манзил ва иш жойига етиб бора олмаган ҳамда ётоқсиз қолган.
Талабалар дипломатлар ва Франкфурт Майн шаҳридаги фаол ватандошлар кўмагида Бош консулхонага олиб келинган.
Таъкидланишича, ишлаш ва саёҳат қилиш мақсадида Германияга келган мазкур талабалар билан муаммоларни юзага келиш сабаблари, маҳаллий иш берувчи томонидан меҳнат шартномасини бажарилиши ҳолатлари бўйича суҳбат ўтказилган. Уларга Германияда бўлиш қоидалари тушунтирилди, ўз хавфсизликларини таъминлаш, шахсий мулк ва ҳужжатларини эҳтиёт қилишлари юзасидан тегишли чоралар кўришлари лозимлиги айтиб ўтилган.
“Молиявий жиҳатдан қийин аҳволда қолган талабаларга тезкорлик билан ёрдам кўрсатиш мақсадида Ўзбекистон Миграция агентлиги билан ҳар бир талаба белгиланган меъёрда кунлик харажатлар учун зарур маблағ билан таъминланди ва меҳмонхонада яшаш харажатларини қоплаб бериш юзасидан агентлик билан келишиб олинди. Шунингдек, талабаларга Франкфурт Майн шаҳридан вақтинча яшаб туришлари учун меҳмонхонадан жой олишда амалий ёрдам кўрсатилди”, дейилади хабарда.
Қайд этилишича, вақтинча иш билан таъминлашда воситачилик қилган Германиянинг Nova Agency компанияси масъул ходимлари билан кечган мулоқотда юзага келган муаммолар муҳокама қилинган.
2023 йилда ишлаш мақсадида Германияга ишлаш учун бориб сарсон бўлиб юргани 300 га яқин ёшлар бир неча кун вокзалда тунагани ҳақида хабарлар тарқалганди.
Кейинчалик маълум бўлишича, Turon World Cooperation хусусий бандлик агентлиги МЧЖ вакиллари ўзларига таниш бир қатор ташкилотлар билан ҳамкорликда 2023 йилнинг май—июнь ойларида Work and travel дастури орқали Германияга 102 нафар талабани жўнатган, аммо Германияга етиб борган талабаларни иш билан таъминлашда муаммолар юзага келган.
2024 йилнинг сентябрида ўзбекистонликлар учун Германияга миграция масаласида бир қатор енгилликлар ишлаб чиқилаётгани маълум қилинганди. Ўша йили Самарқандда бўлиб ўтган Ўзбекистон—Германия олий даражадаги музокаралари натижасида бир қатор ҳужжатлар имзоланганди. Улар орасида “Миграция ва мобиллик соҳасида ҳар томонлама шериклик тўғрисида” ҳукуматлараро битим ҳам бор эди.
Ўзбекистон олий ўқув юртлари ва касб-ҳунар коллежларининг дипломлари Германияда тан олинишига эришиш ҳам режалаштирилмоқда.
Изоҳ (0)