Тошкент вилоятининг Янгийўл туманидаги хонадонда газ портлади. Бу ҳақда туман ҳокимлиги матбуот хизмати хабар берди.
27 март куни соат 21:50 ларда Янгийўл туман Марказий шифохонаси шифокори Л.Ғуломованинг хабарига кўра, 55 ёшли Б.А ва унинг 46 ёшли турмуш ўртоғи Ў.А. танаси 60 фоиз куйиши ташхиси билан келган.
Олиб борилган тезкор суриштирув ишлари натижасида туманнинг “Гулбаҳор” маҳалласидаги уйнинг 2-қаватида жойлашган хонадонда тўпланиб қолган табиий газ чақнаши натижасида портлаш содир бўлгани аниқланган. Ижтимоий тармоқларда тарқалган видеода ҳодиса оқибатида ёнғин келиб чиққанини кўриш мумкин.
Чақнаш натижасида 5 қаватли уйнинг 3 та қават ойналари синган. Ушбу кўп қаватли уй тўлиқ битказилиб топширилмагани сабабли бу ерда фуқаролар яшамаслиги аниқланди.
Янгийўл тумани ҳокимлигининг “Дарё” сўровига кўра аниқлик киритишича, эр-хотин ҳали фойдаланишга топширилмаган хонадонда олиб бораётган таъмирлаш ишларини кўздан кечириш учун кириб, “свет”ни ёққанида портлаш юз берган.
2025 йилнинг февралида Бухоро вилоятининг Ғиждувон туманидаги уйда газ портлаганди. Ҳодиса оқибатида уйнинг бир қисми қулаб тушган.
Изоҳ (0)