Шимолий Македониянинг Кочани шаҳридаги дискотекада юз берган ёнғин натижасида камида 50 киши ҳалок бўлди. МIA агентлигининг ИИВга асосланиб хабар беришича, у ерда жами 1,5 минг киши бўлган.
Puls (Пулс) дискотекасида ёнғин тахминан соат 3:00 да (Тошкент вақти билан 7:00) содир бўлган. Бунга DNK гуруҳининг концерти пайтида пиротехника воситаларидан фойдаланилгани сабаб бўлган деб тахмин қилинмоқда.
Ички ишлар вазирлиги расмий баёнот бермаган бўлса-да, бироқ агентликка камида 50 киши ҳалок бўлгани, ўнлаб жабрланганлар мамлакатнинг турли шаҳарларидаги шифохоналарга етказилганини маълум қилган.
Тасдиқланмаган маълумотларга кўра, концерт ўтказилган тунги клуб эгаси ҳибсга олинган.
Воқеа жойига бош вазир Кристиан Мицкоски ва ҳукумат аъзолари етиб келган.
Аввалроқ 21 январь куни Туркиянинг Болу шаҳридаги тоғ-чанғи курортида жойлашган меҳмонхонада кенг кўламли ёнғин содир бўлганди. Ёнғин оқибатида 79 киши ҳалок бўлган, яна 51 киши жароҳатланган. Воқеа содир бўлган вақтда бинода 240 га яқин одам бўлган.
Изоҳ (0)