Тошкент шаҳрининг Янгиҳаёт туманидаги заводлардан бирида 6 март куни божхона органлари томонидан ноқонуний муомаладан олиб қўйилган 132 180 қути тамаки маҳсулотлари йўқ қилинди.
Қоғоз қути ва ўрамлар тарозида тортилиб, қайта ишлаш учун тадбиркорларга топширилади. Атроф-муҳит ва инсон саломатлигига зарар етказмаслик ҳамда чиқиндилардан оқилона фойдаланиш мақсадида бу галги йўқ қилиш жараёнида янги ёндашув қўлланди. Ноқонуний муомаладан олиб қўйилган тамаки маҳсулотлари суд қарорига кўра йўқ қилинишидан олдин қоғоз ўровларидан ажратилди. Махсус печларда фақат сигарет доналари ҳамда полиетелин ёқилди. Бу жараёнда журналистлар, блогерлар ҳамда Божхона институти курсантлари бевосита иштирок этди.
Сўнгги йилларда божхона органлари томонидан ноқонуний тамаки маҳсулотларини очиқ тарзда йўқ қилиш анъанага айланди. Бундай чоралар жамият томонидан ижобий баҳоланиб, қонунбузарликларнинг олдини олишда самарали натижалар бермоқда. 2024 йилда Ўзбекистонда тамаки маҳсулотларининг ноқонуний айланмаси ҳажми 19,4 фоиздан 9,6 фоизгача камайган.
Йўқ қилинган маҳсулотларнинг аксарияти Тошкент аэропортида қўлга олинган. Ноқонуний йўллар билан олиб келинган ушбу тамаки маҳсулотларининг умумий қиймати 1 миллиард сўмни ташкил этади.
Ушбу галереяда тадбир давомида олинган суратларни томоша қилишингиз мумкин.
Изоҳ (0)