Андижон вилояти ҳокимининг собиқ ўринбосари Ботиржон Хамроев ва 28 нафар мансабдорларга қарши қўзғатилган жиноят иши судда кўрилмоқда. Бу ҳақда “Дарё” манбаси хабар бермоқда.
Ўтган йилнинг ноябрь ойида Андижон вилояти ҳокимининг собиқ ўринбосари — вилоят инвестициялар, саноат ва савдо бошқармаси бошлиғи Ботиржон Ҳамроев ўтказилган текширувлар давомида бюджет маблағларининг талон-торож қилиниши, мансаб ваколатини суиистеъмол қилиш ва бошқа ҳолатлар бўйича терговга чақиртирилгани ва процессуал тартибда ушлангани хабар қилинганди.
Шундан сўнг унинг уйидан катта миқдорда пул чиққани ҳақида хабарлар пайдо бўлган, бироқ бу борада расмий маълумот берилмаган эди.
“Дарё” манбасининг маълум қилишича, мазкур ишга жами 29 киши айбланувчи сифатида жалб қилинган бўлиб, ишни кўриш Жиноят ишлари бўйича Юнусобод туман суди томонидан 6 ноябрда бошланган.
Судланувчилар Жиноят кодексининг 167-моддаси (Ўзлаштириш ёки растрата йўли билан талон-торож қилиш) 3-қисми а-банди (жуда катта миқдорда) ва в-банди ( уюшган гуруҳ томонидан ёки унинг манфаатларини кўзлаб), 209-моддаси (Мансаб сохтакорлиги) а-банди ( такроран ёки хавфли рецидивист томонидан) ва б-банди (уюшган гуруҳ манфаатларини кўзлаб содир этилган бўлса) назарда тутилган жиноятларни содир этганликда айбланмоқда.
Мазкур иш ЖИБ Юнусобод тумани суди судьяси Зафар Латипов раислигида кўрилмоқда.
Изоҳ (0)