Кувайтда расмий ташриф билан бўлиб турган Шавкат Мирзиёев Ал-Кувайт шаҳридаги “Ас-Салом” сарой-музейи билан танишди.
Президент матбуот хизматининг маълум қилишича, сарой 1960—1964 йилларда ўзига хос араб меъморчилиги услубида бунёд этилган ва 1990 йилгача Кувайтга ташриф буюрган хорижий раҳбарлар учун расмий қароргоҳ бўлиб хизмат қилган.
2019 йилда саройда музей очилган бўлиб, унда 32 минг квадрат метр майдонда Кувайтнинг кўп асрлик тарихи ва маданиятини акс эттирувчи ноёб экспонатлар намойиш этилмоқда.
Давлат раҳбари музей экспозицияси билан танишиб, унинг меъморий концепцияси ва замонавий инфратузилмасини юқори баҳолади.
Ўзбекистон билан Кувайт маданий алмашинувларини, хусусан, музей иши ва тарихий меросни асраш соҳасидаги алоқаларни кенгайтириш, қўшма гуманитар дастурларни амалга ошириш ва ўзаро кўргазмалар ташкил этиш муҳимлиги қайд этилди.
Якунда Шавкат Мирзиёев музейнинг Фахрий меҳмонлар китобида дастхат ёзиб қолдирди.
-nW6Of27u.jpg)
Шавкат Мирзиёевнинг Кувайтга расмий ташрифи биринчи куни
Шавкат Мирзиёев Кувайт амири Мишъал ас-Сабоҳнинг таклифига биноан 17 февраль куни расмий ташриф билан ушбу мамлакатга етиб борди. Ал-Кувайт халқаро аэропортида давлат раҳбарини Амир Шайх Мишъал ас-Сабоҳ, Валиаҳд Шайх Сабоҳ Холид ал-Ҳамад ас-Сабоҳ ва бошқа расмий шахслар кутиб олди.
“Ал-Баян” саройида Шавкат Мирзиёев ва Кувайт амири Шайх Мишъал ас-Сабоҳ тор доирада учрашув ҳамда расмий делегациялар аъзолари иштирокида музокара ўтказди. Музокаралар якунида Ўзбекистон президенти ва Кувайт амири Ўзбекистон—Кувайт кенг қамровли шериклик муносабатларини ривожлантириш тўғрисида қўшма баёнот қабул қилди. Қатор ҳукуматлараро ва идоралараро ҳужжатлар имзоланди.
“Ал-Баян” саройидаги музокаралар якунлангач, Шавкат Мирзиёев шарафига Кувайтдаги дипломатик миссиялар раҳбарлари иштирокида тантанали қабул маросими уюштирилди.
Ташриф давомида Шавкат Мирзиёев Кувайт бош вазири вазифасини бажарувчи, ички ишлар вазири Шайх Фаҳд ас-Сабоҳ бошчилигидаги делегацияни қабул қилди, Кувайт ташқи ишлар вазири Абдулла ал-Яҳё билан учрашув ўтказди. Шунингдек, қатор компаниялар раҳбарлари билан учрашувлар ўтказди.
Изоҳ (0)