18 ёшли Хитойнинг “Бейжин Гоан” клуби ҳимоячиси Го Цясюан Мадридда “Алкобендас”га қарши ўтказилган ўртоқлик учрашувида олган жароҳатидан сўнг бир ҳафтадан бери сунъий нафас олиш аппаратида қолмоқда. Футболчининг миясига қон қуйилган. Бу ҳақда South China Morning Post хабар бермоқда.
Манбанинг маълумотига кўра, тез ёрдам автомобили кўмагида шифохонага ётқизилган футболчига бош мияда қон кетиши кузатилган. Бундай жароҳатдан сўнг тикланиш имкониятлари деярли йўқлиги аниқланган. Учрашувда рақиб футболчиси унинг бошига тиззаси билан зарба берган.
Испанияда футболчини сунъий нафас олиш аппаратидан узиш режалаштирилган эди. Маълум қилинишича, унда клиник ўлим қайд этилган. Аммо спортчининг оиласи клуб раҳбарияти ва Хитой футбол ассоциациясини ҳолатга жалб қилиб, унинг даволаниши ва Хитойга қайтарилиши учун барча харажатларни қоплашга кўндира олди.
Го Цясюан 2023 йилдан буён “Бейжин Гоан” сафида ўйнайди. У, шунингдек, Хитойнинг U-17 жамоасига чақирилган. 2023 йилда Го “Бавария” клубида энг истедодли ёш хитойлик футболчи сифатида амалиёт ўтаган.
Изоҳ (0)