Ўзбекистонда 2024 йил давомида туғилган эгизаклар ҳақида маълумот берилди.
Статистика агентлигининг дастлабки маълумотларига кўра, 2024 йил давомида мамлакат бўйича 21 107 нафар эгизак туғилиш ҳолатлари ФҲДЁО органлари томонидан қайд этилган.
Шундан:
- ўғил болалар — 10 630 нафар
- қиз болалар — 10 477 нафарни ташкил қилмоқда.
Бундан аввал Статистика агентлиги 2024 йилда туғилган чақалоқларнинг ота-онаси ёши бўйича маълумотларни эълон қилганди. 2024 йил январь декабрь ойларида туғилган чақалоқлар отасининг ёши бўйича 10,7 фоиз чақалоқлар отасининг ёши 25 ёшгача, 82,5 фоизининг отаси 25-39 ёшларга ҳамда 6,8 фоиз чақалоқларнинг отаси 40 ёш ва ундан катта ёшдагилар ҳиссасига тўғри келган.
Туғилиш статистикаси
2024 йилда Ўзбекистонда 926,4 минг нафар бола туғилган. Шундан 479,5 минг нафари ўғил, қолган 446,9 минг нафари қизлар. Мамлакатда 2018 йилдан бери биринчи марта туғилишнинг йиллик ўсиши тўхтаган. Ўтган йилда туғилганлар сони нафақат 2023 йил, балки 2022 йил кўрсаткичидан ҳам паст бўлган.
Туғилишнинг камайиши республиканинг барча ҳудудларини қамраб олган. Гарчи шиддат билан қисқараётганига қарамай, энг юқори туғилиш даражаси Сурхондарёда, энг кам туғилиш Қорақалпоғистонда. Шаҳарларда туғилиш қишлоқлардан кўра тезроқ қисқармоқда. Хусусан, 2023 йилда шаҳарларда 480,2 минг бола туғилган бўлса, 2024 йилда бу кўрсаткич 454,5 мингтагача кескин қисқарган. Қишлоқларда эса 2023 йилда 481,8 минг, ўтган йили 471,9 минг чақалоқ дунёга келган.
Никоҳлар ва ажрашишлар
2024 йилда Ўзбекистонда 271,8 мингта никоҳ қайд этилган. Бу камида 15 йиллик минимум кўрсаткич ҳисобланади. Ҳатто 2010 йилда ҳам 292,3 минг никоҳ рўйхатга олинган. Яъни никоҳлар аҳоли сонига мутаносиб равишда ўсмаган.
Ўтган йил мобайнида никоҳ тузганларнинг 136,7 минг нафари (50,3 фоиз) шаҳарларда, 135,1 минг нафари (49,7 фоиз) қишлоқ жойларида яшовчилар бўлган.
Ўтган йили никоҳланувчиларнинг ўртача ёши ошишда давом этган. Яъни эркакларда 27,1 ёш, аёлларда 22,3 ёшга етган (2023 йилга нисбатан 0,1 ёшга юқорилаган).
Никоҳлар сонининг энг кўп улуши Самарқанд (31,4 мингта), Қашқадарё (29,2 мингта), Фарғона (29,2 минг та) вилоятлари ҳиссасига тўғри келган.
Изоҳ (0)