Ўзбекистон терма жамоаси ҳимоячиси Абдуқодир Ҳусанов Англиянинг “Манчестер Сити” клуби билан шартномага имзо чекди. Бу ҳақда “Мета-ратингс.кз” сайти маълум қилди.
Манба берган маълумотга кўра, шартнома имзолаш маросимида Гвардиоланинг шахсан ўзи иштирок этган.
16 январь куни футболчи Манчестер шаҳрига етиб борган эди. Футболчи тиббий кўрикдан муваффақиятли ўтган. Ҳусанов ва клуб ўртасида 4,5 йиллик шартнома имзоланиш кутилаётган эди. Романо ҳам ўз ижтимоий тармоғидаги саҳифасида шартнома имзоланганини тасдиқлади. Келишувга кўра, шартномани яна бир йилга чўзиш мумкин. Абдуқодир ўзига 45-рақамни танлаган.
Шу тариқа Абдуқодир Ҳусанов Англия Премьер Лигасида ўйнайдиган биринчи ўзбек футболчисига айланади. Англиянинг юқори дивизионида футболчилари ўйнаган давлатлар сони эса 119 тага етади.
Маълумот учун, “Ланс” Ҳусановни 2023 йил июль ойида “Энергетик-БГУ”дан 100 минг еврога сотиб олганди.
Ҳусанов Франция клуби сафида 31 та ўйинда майдонга тушиб, бир марта голли узатма амалга оширди. Унинг француз клуби билан тузган шартномаси 2027 йилнинг июнига қадар амал қилади.
Transfermarkt маълумотига кўра, унинг бозор қиймати 12 миллион еврога баҳоланган.
Изоҳ (0)