“Дарё”да Қаршида бир жиноят содир бўлгани, ўғриликка кирганлар хонадондан ҳеч нарса олишмагани, гумонланувчиларни излаётган ИИБ эса кечаси кўчада юрганларни ҳам сўроққа чақириб, ҳеч бўлмаганда Маъмурий жавобгарлик тўғрисидаги кодекснинг 183 ва 194-моддалари билан уларни айблаб, бирин-кетин қамаётгани хабар берилганди. ИИБ ходимига бўйсунмади, майда безорилик содир этди дея навбатчи айбловлар билан 7-10 суткага қамалган фермерлар “Дарё” мухбирига бу ҳақда гапириб бергач, туман ИИБга чақирилган.
Мени ҳам қайта-қайта безовта қилишди. Аммо расмий чақирув қоғози беришмагани учун ИИБга бормадим. Анвар исмли фермерни мажбурлаб, туман ИИБга олиб боришган ва босим қилишган, дейди муаммони гапирганидан сўнг ўзларига босим қилинаётганидан шикоят қилган фермер Бекзод Фармонов.
Фермерларнинг маълумот беришича, 2024 йилнинг 25 ноябрь куни Қарши туманининг Чароғил қишлоғидаги хонадонларнинг бирига ўғриликка тушилган. Лекин ҳеч нарса ўғирланмаган. Ўғриликка киргани айтилаётган уч киши хонадоннинг ёши кексаларидан бирига тан-жароҳати етказган. Хонадон эгасининг ёш қизи уйидан яширинча чиқиб, қўшниларига хабар бериши сабаб гумонланувчилар воқеа жойидан қочиб кетган. Вилоят ҳамда туман ИИБларидан иборат махсус гуруҳ ўшандан бери гумонланувчиларни изламоқда. Бироқ, жиноят иши ҳали очилмаган.
Анвар исмли фермернинг айтишича, уни туман ИИБга мажбуран олиб бориб, босим ўтказган ходимларнинг бири Шерзод, иккинчиси Улуғбек ва учинчиси эса Илҳом бўлган.
Столнинг устига пиёла қўйиб, шуни бор қилувчи ҳам, йўқ қилувчи ҳам биз бўламиз дейишди, дейди фермер.
Фермер Бекзод Фармоновнинг қўшимча қилишича, туман ИИБ ходимлари муаммо ҳақида журналистга гапирган яна бир фермер — Жамшид Қиёмовни ҳам чақиртирган.
Менга ҳам Жамшид ҳам чақирув қоғози бермагани учун бормадик. Расмий чақирув қоғоз беринг, кейин борамиз дедик, дейди фермер.
Қашқадарё вилоят ИИБ ахборот хизмати ҳозирча фермерларнинг дастлабки чиқишига ҳам муносабат билдирмади.
Изоҳ (0)