Сурияда исёнчилар Хомс шаҳрини босиб олганларидан сўнг мамлакат пойтахти Дамашққа бостириб кирганликларини эълон қилди. Сурия президенти Башар Асад оиласи билан мамлакатни тарк этгани айтилмоқда. Бу ҳақда Reuters хабар берди.
Исёнчилар Дамашққа киришидан бир неча соат олдин Хомс шаҳрини бир кунлик жанглардан сўнг тўлиқ назоратига олди. Хомснинг қўлга киритилиши уларга Суриянинг стратегик жиҳатдан муҳим марказини ва асосий йўл чорраҳасини назорат қилиш имконини берди.
“Сурия армияси қўмондонлиги офицерларни президент Башар Асаднинг 24 йиллик ҳукмронлиги тугагани ҳақида хабардор қилди”, деди суриялик офицер Reuters агентлигига.
Исёнчилар Дамашқ “энди Асаддан халос бўлгани”ни таъкидлади. Икки нафар юқори мартабали армия зобитига кўра, Башар Асад Дамашқдан номаълум йўналишда учиб кетган.
Flightрадар сайтига кўра, Сйриан Аир авиакомпанияси самолёти Дамашқ аэропортидан тахминан исёнчилар пойтахтни қўлга киритгани ҳақида хабар тарқалган пайтда парвоз қилган. Суриянинг хориждаги асосий мухолифат гуруҳи раҳбари Ҳоди ал-Баҳро ҳам Дамашқ энди “Башар Асадсиз” эканини таъкидлаган.
Исёнчилар шаҳар қамоқхонасидан минглаб маҳбусларни озод қилган. Хавфсизлик кучлари уни шошилинч тарк этган. Шаҳар атрофидаги туманларда Асаднинг отаси, марҳум президент Ҳофиз Асад ҳайкали бузиб ташланиб, парчалаб юборилган. Шаҳар ташқарисида исёнчилар 24 соат ичида бутун жануби-ғарбни эгаллаб, ўз назоратини ўрнатди.
Бош вазири ҳокимиятни топширишга тайёр
Al Arabiya телеканалига кўра, Сурия бош вазири Муҳаммад Ғози ал-Жалолий Сурия халқи томонидан танланган ҳар қандай раҳбарият билан ҳамкорлик қилишга ва ҳокимиятни “топшириш” учун ҳар қандай чора кўришга тайёрлигини маълум қилган.
У “Сурия давлатининг барча институтлари”ни сақлаб қолишга чақириб, давлат ишларини бошқаришни давом эттиришга тайёрлигини айтган. Ал-Жалолий унга ҳеч қандай лавозим ва имтиёзлар керак эмаслигини таъкидлаган ва ўз уйида экани, уни тарк этиш ниятида эмаслигини билдирган.
AFP агентлиги исёнчилар етакчисига таяниб, Дамашқдаги давлат идоралари ҳокимият расман ўтказилгунга қадар бош вазир назорати остида қолишини маълум қилди.
Изоҳ (0)