Россия Ташқи ишлар вазирлиги Суриядаги вазият, жумладан, президент Башар Асад мамлакатни тарк этганига муносабат билдирди. Бу ҳақда Россия Ташқи ишлар вазирлиги хабар берди.
Маълум қилинишича, Башар Асад қуролли можаро иштирокчилари билан музокаралари натижасида президентликдан кетишга қарор қилган. У ҳокимиятни тинч йўл билан топшириш бўйича кўрсатма бергандан сўнг мамлакатни тарк этган. Россия ушбу музокараларда иштирок этмаган.
Россиянинг Сурия ҳудудидаги ҳарбий базалари юқори жанговар шайлик ҳолатида. Айни пайтда уларнинг хавфсизлигига жиддий таҳдид йўқ, дейилади баёнотда.
Россия Сурия мухолифати гуруҳларининг барча аъзолари билан алоқада бўлиб турибди. Россия томони, шунингдек, Сурия жамиятидаги барча этник ва диний гуруҳларнинг фикрларини ҳурмат қилишга чақирди.
Сурияда исёнчилар Дамашқни эгаллади
28 ноябрь куни Сурия мухолифатининг қуролли гуруҳлари, жумладан, “Ҳаёт Таҳрир аш-Шом” жангчилари Ҳалаб вилоятининг ғарбий ҳудудларида ҳукумат қўшинларига йирик ҳужум бошлади. Улар Ҳалаб шаҳрини олгач, кейинги бир ярим ҳафта ичида Хомс, Хама шаҳарларини ишғол қилди ва Сурия пойтахти Дамашққа етиб келди.
Сурия президенти Башар Асад оиласи билан мамлакатни тарк этгани ҳақида хабарлар тарқалди. Syrian Аir авиакомпанияси самолёти Дамашқ аэропортидан тахминан исёнчилар пойтахтни қўлга киритгани ҳақида хабар тарқалган пайтда парвоз қилган. Суриянинг хориждаги асосий мухолифат гуруҳи раҳбари Ҳоди ал-Баҳро ҳам Дамашқ энди “Башар Асадсиз” эканини таъкидлаган. Кейинроқ Reuters нашри Асад бортида бўлган самолёт радарлардан йўқолгани, эҳтимол, уриб туширилган бўлиши мумкинлигини маълум қилди.
Бош вазири ҳокимиятни топширишга тайёр
Сурия бош вазири Муҳаммад Ғози ал-Жалолий Сурия халқи томонидан танланган ҳар қандай раҳбарият билан ҳамкорлик қилишга ва ҳокимиятни “топшириш” учун ҳар қандай чора кўришга тайёрлигини маълум қилган. У “Сурия давлатининг барча институтлари”ни сақлаб қолишга чақириб, давлат ишларини бошқаришни давом эттиришга тайёрлигини айтган. Сурия бош вазири Муҳаммад Ғози ал-Жалолий ўз уйидан чиқиб, қуролли шахслар ҳамроҳлигида мухолифат етакчиси билан учрашиш учун кетди.
AFP агентлиги исёнчилар етакчисига таяниб, Дамашқдаги давлат идоралари ҳокимият расман ўтказилгунга қадар бош вазир назорати остида қолишини маълум қилди.
Изоҳ (0)