Англия ва Уэлсда ота-оналар ўғил фарзандларига энг кўп Муҳаммад исмини танлади. 2023 йилда 4600 дан ортиқ бола шу исм билан рўйхатга олинди. Бу ҳақда BBC хабар берди.
Миллий статистика бошқармасига кўра, бу исм 2016 йилдан бери ўғил болалар учун энг машҳур 10 та исм қаторига кириб келаётган эди. Аммо энди у Нуҳ исмини ортда қолдирди. Бироқ ҳудудий фарқлар ҳам мавжуд бўлиб, Муҳаммад исми Англиянинг учта ҳудудида энг машҳур 10 та исм рўйхатига кирмаган.
Муҳаммад исмининг бошқа имловий шакллари — Моҳаммед ва Моҳаммад ҳам Англия ва Уэлс бўйича энг машҳур 100 та исм рўйхатидан жой олган. Муҳаммад исмининг турли хил вариантлари олдинги йилларда ҳам машҳур бўлган.
Оливиа қизлар учун энг машҳур танлов бўлиб қолмоқда, ундан кейинги ўринларда Амелиа ва Исла турибди. Ушбу кучли учлик 2022 йилдан бери ўзгаришсиз қолмоқда. 2023 йили қизлар орасида чизиқча билан ёзилган исмлар ҳам машҳурликка эришган. Бундай исмлар сони 12 330 тадан 19 140 тага ошган.
Қизлар учун энг машҳур 100 та исм рўйхатига Лилаҳ, Рая ва Ҳазел каби янги исмлар кирган. Ўғил болалар учун эса Жах, Энзо ва Бодҳи бўлди.
Маълумот ўрнида, Қирғизистонда Солиҳа ва Муҳаммад исмлари биринчи ярим йилликдаги энг машҳур исмларга айланганди. Статистикага кўра, ўғил болалар орасида энг машҳур 10 та исмлар қаторига Муҳаммад, Умар, Али, Рамазон, Амир, Билол, Усмон, Алихон, Нурислом ва Муҳаммед исмлари кирган. Қизлар орасида эса Солиҳа, Фотима, Айлин, Сафия, Амина, Алия, Райана, Ойша, Ҳадича ва Арузат исмлари машҳур.
Изоҳ (0)