Хитой йирик ерусти ҳарбий кемаси учун қуруқликдаги ядровий реактор прототипини яратди. Бу ҳақда Associated Press хабар берди.
Нашрнинг қайд этишича, бу Пекиннинг мамлакатдаги илк ядровий самолёт ташувчи кемасини яратишдаги аниқ муваффақиятидан далолат беради.
Калифорниядаги Мидлбери халқаро тадқиқотлар институти мутахассислари томонидан олинган сунъий йўлдош тасвирлари таҳлилига кўра, самолёт ташувчи реактор прототипи жануби-ғарбий Сичуань провинцияси Лэшань шаҳри ташқарисидаги тоғли ҳудудни ўрганиш чоғида аниқланган. У ерда Хитой қуролли плутоний ёки тритий ишлаб чиқариш учун реактор қураётгани тахмин қилинган.
Айни вақтда фақат иккита давлат — АҚШ ва Франция атом авиаташувчи кемаларига эга.
Хитой ҳарбий-денгиз кучларида учта анъанавий двигателли самолёт ташувчи кемалар мавжуд. Аввалроқ Хитой расмийлари тўртинчисини қуриш устида иш олиб борилаётганини айтган, бироқ у қандай двигатель билан жиҳозланишига аниқлик киритмаган.
Атом самолёт ташувчиларни қуриш кўпроқ вақт талаб этади. Бироқ улар денгизда узоқроқ туриши мумкин. Бу турдаги кемалар ёнилғи қуйишни талаб қилмайди ҳамда бортда ёнилғи ва махсус аслаҳалар учун кўпроқ жой мавжуд.
Изоҳ (0)