Келгуси ҳафта Австралия парламентига 16 ёшгача бўлган болаларнинг ижтимоий тармоқлардан фойдаланишини чеклаш тўғрисидаги қонун лойиҳаси киритилади.
Австралия бош вазири Энтони Альбанезе бундай қонун зарурлигини тушунтирар экан, у ижтимоий тармоқлар австралиялик болаларга етказадиган “зарар”ни минималлаштириши кераклигини айтган.
“Бу қонун ота-оналар учун. Улар ҳам мен каби интернетда фарзандларининг хавфсизлиги ҳақида қайғурадилар. Мен австралиялик оилалар ҳукумат уларга ёрдам беришини билишларини истайман”, деб ваъда берди Энтони Альбаниз.
Бош вазирнинг таъкидлашича, қонун лойиҳасини муҳокама қилиш чоғида ҳукумат нафақат ота-оналар, ўқитувчилар, болалар тарбияси бўйича мутахассислар, балки платформалар билан ҳам маслаҳатлашган.
Альбанизга кўра, ушбу қонунни бузганлик учун жавобгарлик болалар ва уларнинг ота-оналарига эмас, балки ижтимоий тармоқларнинг ўзига юкланади. Платформалар “болаларни ўзларидан узоқлаштириш учун оқилона чоралар кўришларини” исботлашлари керак. Қонун матни истисноларни назарда тутиб, таълим мақсадларида ижтимоий тармоқлардан фойдаланишни чекламайди.
Ҳозирда Австралияда кўплаб ижтимоий платформалар 13 ёшдан ошган болаларга аккаунт яратиш имконини беради. Қонун лойиҳаси парламентда қабул қилинганидан кейин 12 ой ўтгач кучга киради.
Австралиянинг энг йирик болалар ҳуқуқлари ташкилотларидан бири мазкур тақиқни танқид қилиб, уни “жуда қўпол восита” деб атаган.
Изоҳ (0)