“Барселона” 2025 йилнинг ёзида биринчи бўлиб сотиб олмоқчи бўлган футболчи борасида бир қарорга келди. Бу ҳақда Испаниянинг Relevo нашри журналисти Алекс Пинтанел Х (собиқ Twitter) ижтимоий тармоғида хабар берди.
Манба берган хабарга кўра, каталонияликлар янги дарвозабонга эҳтиёж сезмоқда ва биринчи навбатда “Манчестер Сити” қизиқиш билдираётган “Порту”нинг португалиялик дарвозабони Диого Коста билан шартнома имзолашга ҳаракат қилади.
“Барселона” спорт директори Деко Португалия дарвозабони Костани Каталония жамоасида кўришдан хурсанд бўлишини билдирганди. Бундан ташқари, футболчининг агенти машҳур португалиялик мураббий Хорхе Мендеш бўлиб, у Деку билан фаол алоқада.
Маълумот учун, 6-турда “Вильярреал”га қарши ўйинда (5:1) Тер Штеген ўнг тиззасининг пайи узилиши натижасида мавсумнинг қолган қисмини ўтказиб юбориши маълум бўлганди. Айни пайтда унинг ўрнини эгаллаган Иньяки Пеня Каталония дарвозасини қўриқламоқда. Шунингдек, “Барселона” мавсум охиригача полшалик дарвозабон Войцеҳ Шенсни билан шартнома имзолади.
25 ёшли Диого Коста “Порту” тарбияланувчиси ҳисобланади. Жорий мавсумда дарвозабон жамоасининг барча турнирлар доирасидаги 13 та учрашувида қатнашиб, 13 та гол ўтказиб юборди ва 7 та учрашувда дарвозаси дахлсизлигини сақлаб қолди. Футболчининг клуб билан шартномаси 2027 йилнинг июнь ойи охиригача амал қилади. Transfermarkt интернет порталига кўра футболчининг тахминий нархи 45 миллион еврони ташкил қилади.
Изоҳ (0)