Британия ҳукумати украиналик аскарларни ўқитиш учун ҳарбийларни Украинага юбориш имкониятини кўриб чиқмоқда. Бу ҳақда манбаларга таяниб, Тhе Тimes хабар берди.
Режага кўра, британиялик ҳарбий инструкторлар фронтга жўнашдан олдин янги аскарларнинг интенсив базавий тайёргарлигини таъминлаш учун Украинанинг ғарбига жўнатилади. Бу Украина қўшинларини ўқитиш учун Британия базаларига юбориш билан боғлиқ айрим логистика муаммоларини ҳал қилади ва маблағни тежайди, дейди музокаралардан хабардор икки манба.
“Биз у ерда тайёргарликни тезроқ ўтказишимиз мумкин ва бу фронт чизиғидан анча узоқда, хавфсиз жойларда бўларди, шунинг учун ҳан хатар анча кам бўларди”, дейди улардан бири.
Таъкидланишича, Британия аскарлари ҳам украиналик ҳарбийлардан жанг кўникмаларини ўрганади ва энг янги қуролларни синаб кўриш имкониятига эга бўлади.
Россиянинг Украинага кенг кўламли ҳужуми бошланганидан бери 10 минглаб украиналик аскарлар Британияда тайёргарликдан ўтган. Украина президенти Владимир Зеленский 10 октябрь куни Европа бўйлаб сафари доирасида Даунинг-стритдаги Британия бош вазири қароргоҳига ташриф буюриб, у ерда Кир Стармер, шунингдек, НАТОнинг янги бош котиби Марк Рютте билан музокаралар олиб борганди.
Изоҳ (0)