АҚШ маъмурияти Россия уранини олиб киришга қўйилган тақиқнинг бузилиши эҳтимоли муносабати билан Хитойдан уран етказиб берилишини текширмоқда.
Reuters нашрига кўра, Вашингтон Хитой Россиядан бойитилган уран импорт қилаётгани ва шу билан бирга АҚШга ўз маҳсулотлари экспортига шубҳа қилмоқда.
“Биз Россия уранини олиб киришга қўйилган тақиқ четлаб ўтилган бўлиши мумкинлигидан хавотирдамиз”, дейилади Америка уран ишлаб чиқарувчилар уюшмаси (UPА) бош лоббичиси Жон Индаллнинг баёнотида.
Унга кўра, ташкилот АҚШ Савдо вазирлигига аудит ўтказиш илтимоси билан мурожаат қилган.
Қўшма Штатлар Россиянинг Украинага қарши урушни давом эттириш қобилиятини заифлаштириш мақсадида Россия уранига қарши санкциялар киритган эди. Шу билан бирга, Хитойдан Америка Қўшма Штатларига бойитилган уран етказиб бериш кескин ошган, буни Америка савдо агентлиги маълумотлари тасдиқлаган.
Хитойдан АҚШга 2023 йилнинг биргина декабрь ойида деярли 243 тонна бойитилган уран импорт қилинган. Бундан ташқари, 2020 йилдан 2022 йилгача бўлган даврда Пекин ушбу турдаги маҳсулотни АҚШга умуман етказиб бермаган. 2022-2023 йилларда Хитойнинг Россиядан бойитилган уран сотиб олиши сезиларли даражада ошган.
2024 йил сентябрь ойида Россия президенти Владимир Путин уран, титан ва никел экспортини тақиқлаш эҳтимолини эълон қилган.
Изоҳ (0)