Нью Йорк полицияси раҳбари коррупция бўйича терговлар фонида истеъфога чиқди

Нью Йорк полицияси (NYPD) комиссари Эдвард Кабан истеъфога чиқди.

Бу ҳақда Нью-Йорк мэри Эрик Адамс брифингда маълум қилди.

У, шунингдек, собиқ ФҚБ агенти ва Нью-Йоркдаги Ички хавфсизлик департаментининг собиқ раҳбари Том Донлон NYPDнинг вақтинча раҳбари бўлишини эълон қилди.

Пуэрто-Риколик Эдвард Кабан 2023 йил 1 июлда шаҳар полицияси бошлиғи этиб тайинланганди. У мазкур лавозимдаги биринчи аёл Квичант Севел ўрнини эгаллади.

The New York Times унинг истеъфосини изоҳлар экан, полицияга аслида Эдвард Кабан эмас, балки шаҳар мэри Эрик Адамс ва унинг маъмурияти аъзолари раҳбарлик қилганини таъкидлади. Адамс 20 йилдан ортиқ Нью-Йорк полициясида фаолият юритган.

Ўтган ҳафтада АҚШнинг Нью-Йорк жанубий округи прокуратураси ва Ички даромад хизматининг жиноий бўлими NYPDнинг юқори мартабали аъзоларига нисбатан катта тергов олиб бораётгани маълум бўлганди.