Алдов йўли билан Россия Мудофаа вазирлиги билан шартнома тузишга мажбурланиб, Украинадаги урушга жўнатилган 45 нафар Ҳиндистон фуқароси Россия армияси сафидан четлаштирилиб, жанговар ҳудуддан олиб чиқилди. Бу ҳақда Ҳиндистон ТИВга таяниб NDTV хабар берди.
Идора маълумотларига кўра, яна 50 нафар Ҳиндистон фуқароси фронтда қолмоқда. Мамлакат Ташқи ишлар вазирлиги уларни “озод қилиш учун ҳаракат қилмоқда”.
Июль ойида NDTV телеканали Ҳиндистон бош вазири Нарендра Моди ва Россия президенти Владимир Путин Украинадаги урушда алданиб қолган ҳиндистонлик фуқароларни Россия армияси сафидан четлаштиришга келишиб олгани ҳақида хабар берган эди. Телекомпания суҳбатдошларининг таъкидлашича, Москва ҳиндларни нафақат армиядан бўшатишга, балки уларнинг ватанларига қайтишини осонлаштиришга ҳам рози бўлган.
Аввалроқ “Дожд” Россия томонидан 90 нафардан ортиқ ҳиндистонлик Украинага алдов йўли билан урушга юборилгани, улардан камида саккиз нафари ҳалок бўлгани ва уларнинг жасадлари ҳали ҳам ўз ватанига қайтарилмагани ҳақида хабар берган эди.
Ҳиндистон парламенти депутати Викрамжит Сингх Саҳнейб сўзларига кўра, Украина билан урушга юборилаётган Ҳиндистон фуқароларининг аксарияти иш билан таъминлаш баҳонасида Россияга таклиф қилиниб, кейин эса таржимонларсиз Россия Мудофаа вазирлиги билан шартнома имзолашга мажбур қилинган.
Ҳиндистон ҳуқуқ-тартибот идоралари мамлакатнинг тўрт нафар фуқаросини одам савдоси тармоғига алоқадорликда гумон қилиб ҳибсга олгани ҳақида маълум қилган. Маҳаллий махсус хизматлар маълумотларига кўра, ушбу тармоқ аъзолари йигитларни алдаб Россияга жўнатган ва у ерда Украинага қарши урушда қатнашишга мажбур қилган.
Изоҳ (0)