Жанубий Кореянинг электроника ишлаб чиқарувчиси Samsung Electronics компанияси баъзи бўлинмаларида чет эллик ходимларини 30 фоизгача қисқартиришни режалаштирмоқда. Бу ҳақда манбаларга таяниб, Reuters хабар берди.
Агентлик маълумотларига кўра, Samsung бутун дунё бўйлаб ўзининг шўба компанияларига сотув ва маркетинг бўлими ходимларини тахминан 15 фоизга, администрация ходимларни эса 30 фоизгача қисқартириш бўйича кўрсатма берган. Режа 2024 йил охиригача амалга оширилади ва Америка, Европа, Осиё ҳамда Африкадаги иш ўринларига таъсир қилади.
“Қанча одам ишдан бўшатилиши ва қайси мамлакатлар ҳамда бизнес бўлинмалари кўпроқ зарар кўриши ҳозирча номаълум”, дейилади хабарда.
Samsung компанияси баъзи чет эл корхоналарида ишчи кучини тартибга солиш самарадорликни оширишга қаратилган кундалик фаолият эканини билдирди.
Reuters манбаларидан бири ходимлар сонининг қисқартирилиши жаҳон иқтисодиётининг секинлашиши шароитида технологик маҳсулотларга бўлган глобал талабнинг пасайишига тайёргарлик кўриш доирасида амалга оширилаётганини айтди.
Маълумот ўрнида, 2024 йилнинг биринчи чорагида Жанубий Кореянинг Samsung гиганти дунёдаги энг йирик смартфон етказиб берувчига айланди.
Изоҳ (0)