Фьюри—Усик 2. Қарама-қаршилик тарихи, боксчиларнинг гонорари ва трансляция ҳақида маълумотлар

Олександр Усик ва Тайсон Фьюри ўртасидаги реванш жанги жорий йилнинг охирида бўлиб ўтади. Жанг 21 декабрь кунига белгиланган.

Саудиянинг Ар-Риёд шаҳри ушбу жангги мезбонлик қилади. Боксчилар маҳаллий Кингдом Арена стадионида тўқнаш келади.

Фьюри—Усик 2 жангини қаерда ва қачон томоша қилиш мумкин?

Ҳозирча жангнинг қайси вақтда бошланиши расман эълон қилинмаган. Бироқ, одатда, Саудияда бўлиб ўтадиган бокс мусобақалари Тошкент вақти билан ярим тунга тўғри келади.

Масалан, Усик ва Фьюри ўртасидаги дастлабки жангнинг асосий карди 21:00 да старт олган ва асосий жанг эрта тонгга яқин бўлганди.

Шунингдек, ҳозирча Ўзбекистоннинг бирорта каналида трансляция борасида хабар йўқ.

Тайсон Фьюри ва Олександр Усик қарама-қаршилигининг тарихи

Фьюри ва Усик дастлабки жангдан олдин ҳам бир неча бор тўқнаш келишга яқин бўлган. Бироқ ҳар сафар қандайдир сабаблар туфайли жанг бекор бўлаверганди. Ниҳоят, 17 май куни жанг бўлиб ўтди ва унда украиналик боксчи очколар эвазига ғалаба қозонди.

Тайсон Фьюри: биографияси ва боксдаги фаолияти

Тайсон Фьюри 1988 йил 12 август санасида Манчестерда таваллуд топган. Отаси Жон Фьюри ҳам бокс билан шуғулланган ва Майк Тайсоннинг ашаддий мухлиси бўлган. Шунинг учун фарзандининг исмини америкалик боксчи шарафига қўйган. Тайсоннинг амакиси Питер Фьюри эса унинг мураббийи ҳисобланади. Фьюри ҳаваскор боксда 35 та жанг ўтказиб, 31 та ғалаба қозонган.

Тайсон Фьюрининг бўйи — 206 см, сўнгги жангидан олдинги вазни — 118,8 кг.

Тайсон Фьюрининг статистикаси

“Лўлилар қироли” лақабини олган Фьюрининг профессионал рекорди — 34 та ғалаба, битта мағлубият ва битта дуранг. 24 та жангини муддатидан аввал якунлаган.

Профессионал фаолияти

Тайсоннинг фаолияти 2008 йил декабрь ойида бошланган, дастлабки жангининг биринчи раундида Белу Гонгосини техник нокаутга учратган. Дастлабки 7 жангида Фьюри муддатидан олдин ғалаба қозонган, 8-жангини эса камар учун ўтказган: 10 раунд давом этган жангда Жон Макдермоттни мағлуб этиб, BBBofC English Heavy камарини қўлга киритган.

Профессионал фаолиятидаги 25-жангини эса 2015 йил ноябрь ойида Владимир Кличкога қарши ўтказиб, ғалаба қозонган ҳолда 4 та нуфузли титулга эга чиққан. 31-жангида эса (2020 йил) Деонтей Уайлдерни таслим этиб, WBC титулини қўлга киритган.

Сўнгги жанги

Тайсон Фьюри сўнгги жангини 2024 йилнинг 17 май санасида Олександр Усикка қарши ўтказиб, очколар ҳисобига мағлубийиатга учради. Шу тариқа британиялик боксчи барча камарларини Усикка ютқазиб қўйди.

Навбатдаги жанги

Фьюрининг кейинги жанги ҳақида ҳозирча маълумотлар йўқ. Агарда Олександр мағлуб этилса, улар ўртасидаги учинчи жанг ташкил этилиши мумкин.

Тайсон Фьюрининг ҳозирги рейтинги қандай?

“Лўлилар қироли” BoxRec талқинига кўра вазн тоифасидан қатъи назар тузилган рейтингда 46-ўринни эгаллаб турибди.

Олександр Усик: биографияси ва боксдаги фаолияти

Олександр Усик 1987 йил 17 январда Симферополда таваллуд топган. Усик болалигида миллий рақс, дзюдо ва футбол билан шуғулланган. “Таврия” ёшлар жамоасида чап қанот ярим ҳимоячиси позициясида ҳаракат қилган.

Усикнинг бўйи — 191 см, сўнгги жангидан олдинги вазни — 101,4 кг.

Олександрнинг статистикаси

Усикнинг профессионал боксдаги рекорди — 22 ғалаба ва бирорта мағлубият йўқ. 14 та жангини муддатидан аввал якунлаган.

Усикнинг профессионал фаолияти

Олександрнинг фаолияти 2013 йилнинг ноябрь ойида бошланган ва илк жангида Фелипе Ромерони 5-раунддаёқ техник нокаутга учратган. Дастлабки 9 жангида Усик муддатидан аввал ғалаба қозонган.

10-жангида Усик илк бор асосий камар учун жанг қилди: 2016 йилнинг сентябрь ойида 12 раунд давом этган жангда Кшиштоф Гловацкийни енгиб, WBO титулига эга чиқди. 15-профессионал жангида Усик Мурат Гассиев устидан ғалаба қозониб, жаҳон чемпионига айланди.

Усикнинг сўнгги жангги натижаси

Олександр Усик 2024 йилнинг 17 май санасида Тайсон Фьюрига қарши рингга кўтарилди. Украиналик боксчи ҳакамлар қарорига кўра, ғалаба қозонди ва оғир вазн тоифасида мутлақ жаҳон чемпионига айланди.

Кейинги жангги

Ҳозирча бу ҳақида ҳеч қандай маълумот йўқ. Фьюрига мағлуб бўлса, улар ўртасидаги учинчи жанг бўлиб ўтиши мумкин. Ундан ташқари Энтони Жошуа ва Даниэль Дюбуага қарши эҳтимолий жанглар бўлиб ўтиши кўзда тутилган.

Усикнинг рейтинги

Украиналик боксчи BoxRec талқинига кўра вазн тоифасидан қатъи назар тутилган рейтингда 14-поғонани эгаллаб турибди.

Гонорарлар

Фьюрининг Усикка қарши жангдан олган гонорари очиқланмаган, бироқ Independent нашрининг хабарига кўра, биринчи жангдан британиялик боксчи 150 миллион доллар ишлаб топган.

Усикнинг ҳам гонорари борасида аниқ маълумот йўқ. Аввалроқ украиналик боксчи Фьюрига қарши жангдаги умумий гонорар бюджетининг 30 фоизини олгани айтилганди. Бу 65 миллион долларга тўғри келади.

Усик — Фьюри: ОАВ билан мулоқот

“У билан жанг қилиш кутганимдан осонроқ кечди. Одам унга зарба бериш қийин дейишарди, лекин мен турли комбинацияларни қўллаб кўрдим ва унинг устидан кула олдим. Эҳтимол, муаммо мен жуда қувноқ бўлганимдадир. Баъзан олдимда ҳаваскор боксчи тургандек ҳис қилдим. Мен бу жангдан завқ олдим”, — дейди Тайсон Фьюри журналист Майкл Бенсон билан суҳбатда.

“Бу сафар гонорар менинг фойдамга каттароқ нархда бўладими? Аниқ эмас. Биринчи имзоланган шартномамда реванш ҳақида банд боре ди. Реваншнинг молиявий томонлари ёзилган эди. 90 миллион менга, 60 миллион Фьюрига? Шунақа бўлса, зўр бўларди. Ҳар биримизнинг Саудия Арабистони билан шахсий битимимиз мавжуд. Уни очиқлаш мумкинмас. Рақамлар умуман ошкор этилмади”, — дейди Усик.

Усик—Фьюри 2 учун фикр

“Менимча, Фьюрининг отаси четроқда тургани маъқул. У шундай қилишга мажбур. Исталган мураббий айтиши керак бўлган гапни айтаман: сизнинг бурчагингизда иккинчи мураббий ёки ёрдамчи бўлиши мумкин, бироқ сиз барча баҳсларни раундлар пайтида қилишингиз керак бўлади. Раундлар орасида эса фақат битта овоз янграши лозим. Акс ҳолда жангчи ўзини йўқотиб қўяди ва: “Қайси бирини эшитишим керак, жин урсин?”, дея ўйлайди. Тайсон билан танаффус пайтида фақат бир киши гаплашиши керак”, — дейди афсонавий боксчи Рикки Ҳаттон.

Реванш олдидан фактлар:

— Жанг учта камар учун кечади — июнь ойида Усик IBF камаридан воз кечганди, эндиликда бу камар Даниэль Дюбуага тегишли;

— Реванш — Биринчи жангнинг натижасидан қатъий назар боксчиларнинг шартномасида иккинчи жанг мавжуд эди. Лекин Фьюри ғалаба қозонган тақдирда, трилогия ҳақида ҳеч ким гапирмаган;

— Бу Усик учун фаолиятидаги иккинчи дилогия бўлади (биринчиси Жошуага қарши эди), Фьюрида эса аллақачон иккита дилогия мавжуд (Уайлдер ва Чисорага қарши); 

— Агар Тайсон реваншда ғалаба қозонса, XXI асрда оғир вазн тоифасида уч карра чемпион бўлган учинчи боксчига айланади, бундан аввал Леннокс Льюис ва Виталий Кличко бу вазифани уддалаган. Лекин Энтони Жошуада бу миссияни 3 ой олдин бажариш имконияти мавжуд.