Россия-Украина уруши фонида Литва ҳукумати оммавий эвакуация қилишнинг миллий режасини тайёрламоқда.
Мамлакат ички ишлар вазири Агне Билотайтенинг маълум қилишича, тегишли лойиҳа октябрь ойида тақдим этилади.
“Ҳар бир маҳаллий ҳукуматнинг ўз эвакуация режаси бор, лекин биз миллий миқёсдаги режага эга бўлишимиз ва уни амалга оширишга тайёр бўлишимиз керак”, дейди Билотайте.
Унинг сўзларига кўра, Вильнюс бу масалада бошқа Болтиқбўйи давлатлари билан ҳамкорлик қилишга ва ЕИдан маблағ олиш учун ариза беришга қарор қилган.
Литва Ички ишлар вазирлиги 6 сентябрь куни минтақа давлатларини фуқаролик хавфсизлигини гибрид ва ҳарбий таҳдидларга мослаштиришни таклиф қилаётганликларини билдирган.
Вазирлик, зарур ҳолларда қўшни давлатлар ва минтақанинг бошқа мамлакатларига эвакуация қилиш мумкинлигини айтган. Вильнюсда режалар ишлаб чиқилгандан сўнг, “қўшма машқлар пайтида уларни синаб кўриш” таклиф қилинади. Жараёнга жамоат, нодавлат ташкилотлар, бизнес, халқаро тузилмалар ва Европа Иттифоқи институтлари жалб қилиниши мумкин.
“Биз энди тинчлик давридаги фуқаролик мудофааси чораларига таянолмаймиз”, дейди Билотайте.
Мамлакатда, шунингдек, фавқулодда ва инқирозли вазиятларни бошқаришнинг янги модели яратилган, бошпаналар тармоғи фаол кенгайтирилмоқда, аҳолини огоҳлантириш тизими модернизация қилинмоқда.
Муниципалитет ва вазирликларда аллақачон фуқаролик хавфсизлиги учун масъул бўлган 65 нафар ихтисослашган мансабдор шахслар бор ва Беларусь АЭСда юзага келиши мумкин бўлган аварияга тайёргарлик кўриш бўйича беш йиллик комплекс чора-тадбирлар режаси якунланмоқда.
Литва Сейми 2030 йилгача фуқаро муҳофазасини ривожлантириш дастурини тасдиқлаган, бунинг учун 285 миллион евро ажратилган.
Изоҳ (0)