2024 йил 7 сентябрь куни Тошкент шаҳрида Ўзбекистон Экологик партиясининг V Форуми бўлиб ўтди.
Форумда Қорақалпоғистон Республикаси, вилоятлар ва Тошкент шаҳридан сайланган делегатлар, Ўзбекистон Республикаси Олий Мажлиси Қонунчилик палатаси депутатлари ва Сенати аъзолари, партиянинг Марказий Кенгаши аъзолари, давлат ва жамоат, нодавлат ташкилотлар вакиллари, оммавий ахборот воситалари ходимлари иштирок этди.
Форумда партиянинг аввалги сайловлардаги дастурларида кўзда тутилган мақсад ва ташаббусларнинг амалга оширилиши ва янги Сайловолди дастури муҳокама қилинди.
Ўзбекистон Экологик партиясининг Марказий Кенгаши Ижроия қўмитаси раиси Абдушукур Ҳамзаев ўзининг нутқида 2020-2024 йилларга мўлжалланган сайловолди дастурида белгилаб олинган 80 дан ортиқ вазифаларнинг деярли барчаси бугунги кунга қадар амалга оширилганлиги, мамлакатимизда атроф-муҳит ҳолатини яхшилаш, экологик муаммоларни комплекс ҳал этишга йўналтирилган дастур ва ҳаракатлар стратегиясини илгари суриш каби кенг кўламли ишларда партиянинг фаол иштироки ва муносиб ҳиссасини алоҳида эътироф этди.
Шунингдек, форумда партиянинг янги Сайловолди дастури муҳокама қилинди.
Дастурида давлат томонидан аҳолига қулай шарт-шароитлар яратиш мақсадида мамлакатнинг йўл инфратузилмаси учун ажратиладиган сумманинг муайян қисмини мажбурий равишда пиёдалар йўлакчаларини ташкил этишга йўналтириш, автомобиль йўли қатнов қисми ҳисобидан скутерлар ва велосипедларда ҳаракатланиш учун алоҳида йўлаклар ташкил этиш, Тошкент шаҳри ва вилоятлар марказларида жамоат транспортидан доимий фойдаланувчи шахслар учун йўл ҳақини арзонлаштириб бориш тизимини босқичма-босқич йўлга қўйиш, экология соҳасидаги қонунчилик талаблари ижросини таъминлашда давлат органлари ва хўжалик юритувчи субъектлар жавобгарлигини кучайтириш каби ташаббуслар илгари сурилаётганлиги таъкидланди.
Шунингдек, Сайловолди дастурида шаҳарларда бино ва кўп квартирали уйлар қурилишини мажбурий тартибда жамоатчилик муҳокамасидан ўтказиш механизмларини қонунда аниқ белгилашнинг таклиф этилаётганлиги партиянинг ўз асосий ғоялари йўлида дадил қадам ташлаётганлигини кўрсатмоқда.
Изоҳ (0)