Туркиянинг жануби-шарқидаги Қаҳрамонмараш вилоятида 5 магнитудали зилзила содир бўлди.
Табиий офатларга қарши курашиш бошқармаси (AFAD) маълум қилишича, 5 магнитудали силкиниш маҳаллий вақт билан соат 09:31 да содир бўлган.
Зилзила манбаси Эври шаҳри яқинида, тахминан, 7 километр чуқурликда ва 1,5 миллиондан ортиқ аҳолиси бўлган Газиантеп шаҳридан 50 км узоқликда жойлашган.
Бошқарманинг қайд этишича, табиий офатнинг салбий оқибатлари ҳозирча қайд этилмаган.
2023 йил 6 февраль куни Қаҳрамонмараш вилоятида 7,7 ва 7,6 магнитудали зилзилалар тўққиз соат фарқ билан содир бўлди. Туркия ҳукумати зилзилаларни “аср фалокати” деб атади. Зилзила оқибатида 53 мингдан ортиқ одам ҳалок бўлди, 107 мингдан ортиқ киши жароҳат олди.
17 август куни туркиялик етакчи сейсмолог Нажи Герюр Истанбулда 7 ва ундан юқори магнитудали зилзила эҳтимоли 60 фоиздан ошишини айтганди.
“Истанбулда 7 ва ундан юқори магнитудали янги зилзила башорат қилинган 30 йиллик давр ниҳоясига етмоқда. Биз олдин ҳам бир неча бор 2029 йилгача кучли зилзила кузатилишини айтгандик, унинг кучи 1999 йил 17 августдагидан қолишмайди. Зилзила содир бўлишининг эҳтимоллик даражаси камида 64 фоиз, Истанбул эса бундай зилзилага тайёр эмас”, деганди профессор.
Изоҳ (0)