Миграция агентлиги Қозоғистондаги ўзбекистонликларни огоҳликка чақирди

Миграция агентлиги бўлиб турган ва транзит йўналишида ҳаракатланаётган Ўзбекистон фуқароларини огоҳликка чақирди.

Агентлик томонидан Қозоғистоннинг турли ҳудудларида меҳнат фаолиятини амалга ошириб, ватанга қайтиш вақтида ишончсиз автотранспорт воситалари ва ҳайдовчилар хизматидан фойдаланмаслик сўралди.

Аниқланишича, автоҳалокатларнинг асосий қисми носоз автомобиль ёки тажрибага эга бўлмаган ҳайдовчилар туфайли содир бўлмоқда. Шу муносабат билан, ушбу давлатда бўлиб турган ҳамда катта трассаларда ҳаракатланаётган Ўзбекистон фуқароларидан йўлларда ҳаракатланишда барча хавфсизлик қоидаларига қатъий риоя қилиш, хавфсиз транспорт воситаларидан фойдаланиш, ишончли автотранспорт воситаси ва ҳайдовчилар хизматидан фойдаланиш тавсия этилди.

“Эслатиб ўтамиз, уйда сизни оилангиз кутмоқда”, дейилади мурожаатда.

Аввалроқ Қозоғистоннинг Чимкент вилоятида ўзбекистонликлар бўлган автомобиль ЙТҲга учрагани ҳақида хабар берилганди. Олмаота трассасининг йўл таъмирлаш ишлари олиб борилаётган қисмида Opel Vectra автомобили Toyota Alphard’га бориб урилган.

Оқибатда енгил автомобиль ҳайдовчиси воқеа жойида ҳалок бўлган.

“Яна етти киши жабрланган. Уларнинг барчаси Toyota Alphard салонида бўлган Ўзбекистон фуқаролари бўлиб, Қизилўрдадан уйларига қайтаётган бўлган”, дейилади хабарда.

Жабрланганлар шифохонага ётқизилган. Тергов ишлари олиб борилмоқда.