Америка Қўшма Штатлари Тайван билан биргаликда қурол ишлаб чиқариш лойиҳаларида иштирок этиш имкониятини кўриб чиқмоқда.
Бу ҳақда Америка институтининг Тайвандаги ваколатхонаси директори Реймонд Грин баёнот берди.
“АҚШ ҳозирда бир қатор ҳамкорлар билан ҳарбий техника ишлаб чиқаришни кенгайтириш имкониятларини кўриб чиқмоқда. Тайван келажакда ушбу шериклардан бирига айланишини истисно қилмайман”, — деди дипломат матбуот анжуманида.
Гриннинг қўшимча қилишича, Тайванга қурол етказиб бериш Америка маъмуриятининг устувор йўналишларидан биридир. Дипломат, шунингдек, Қўшма Штатлар Осиё-Тинч океани минтақасида "тийиб туриш қобилиятини" мустаҳкамлаш учун иттифоқлар тармоғини барпо қилаётганини айтди.
АҚШнинг Тайванга қурол-яроғ етказиб бериш бўйича келишуви тахминан 19 миллиард долларни ташкил этади. Хитой Ташқи ишлар вазирлиги маълумотларига кўра, бир неча йил давомида АҚШнинг Тайванга ҳарбий таъминотининг умумий миқдори 70 миллиард доллардан ошган.
12 июль куни Хитой Тайванга қурол экспорти сабабли АҚШнинг қатор компаниялари ва расмийларига санкциялар киритгани хабар берилганди.
Санкцияга учраган компаниялар раҳбарлари ва ҳарбий бюджет учун масъул бўлган АҚШнинг қатор олий вакиллари Хитой қора рўйхатига тушган. Уларга Хитой ҳудудига кириш, ҳисобрақамлар очиш тақиқланган.
Изоҳ (0)