Россия Полтавага ҳужум қилди, 41 киши ҳалок бўлди (видео)

Россия ҳарбийларининг Полтава шаҳрига берган зарбаси оқибатида 41 киши ҳалок бўлди. Бу ҳақда Украина президенти Владимир Зеленский хабар берди.

Ҳужум 3 сентябрь куни эрталаб амалга оширилган. Оқибатда 180 дан ортиқ киши жароҳатланган. Шаҳар баллистик ракеталар билан ўққа тутилган, улар таълим муассасаси ва яқин атрофдаги касалхонага келиб тушган.

“Алоқа институти биноларидан бири қисман вайрон бўлган. Одамлар вайроналар остида қолди. Уларнинг аксарини қутқаришга муваффақ бўлинди. 180 дан ортиқ киши яраланган. Афсуски, қурбонлар кўп. Ҳозирда 41 киши ҳалок бўлгани маълум. Уларнинг барча қариндошлари ва яқинларига ҳамдардлик билдираман”, деди Зеленский.

Сиёсатчига кўра, қутқарув ишларига барча тезкор хизматлар жалб қилинган.

“Мен зарбадан сўнг биринчи дақиқаларданоқ одамларга ёрдам берган, ўзгалар ҳаётини сақлаб қолган ҳар бир кишидан миннатдорман”, дея таъкидлади Украина президенти.