Туркия Европа Иттифоқи ва Шанхай Ҳамкорлик Ташкилоти (ШҲТ) ўртасида танлов қилмайди, ҳар икки ташкилот билан ўзаро алоқада бўлади. Бу ҳақда мамлакат президенти Ражаб Тоййиб Эрдўғон маълум қилди.
Сиёсатчи Туркиянинг Шарқ ва Ғарб давлатлари билан ўзаро муносабатлари борасидаги позициясига изоҳ берди.
Шарқ билан муносабатларимизни мустаҳкамлар эканмиз, Ғарб билан чуқур ҳамкорлигимизни ривожлантириш йўлларини ҳам излаймиз. Баъзилар таъкидлаганидек, биз Европа Иттифоқи ва ШҲТ ўртасида танлов қилишга мажбур эмасмиз, деди Туркия раҳбари.
Эрдўғон, шунингдек, Туркия Шарқ ва Ғарб давлатлари билан бир вақтда алоқаларни ривожлантирсагина самарали давлат бўлиши мумкинлигини айтди. У июль ойида бўлиб ўтган НАТО саммити якунида Туркия ШҲТга тўлақонли аъзо бўлиш ниятида эканини таъкидлади. Ҳозир у ташкилотда кузатувчи мақомига эга.
- Анқара 2005 йилдан бери Европа Иттифоқига тўлақонли аъзо бўлиш учун расман ҳаракат қилмоқда. Туркия ташқи ишлар вазири Ҳоқон Фиданнинг таъкидлашича, Евроиттифоққа аъзо бўлиш Анқара учун стратегик мақсаддир, бироқ у Европа Иттифоқига қўшилиш масаласини Кипр муаммосини ҳал қилиш муаммоси билан боғлашга қарши.
- Туркия ҳукумати аввалроқ Кипр масаласини фақат оролда икки давлат мавжудлигини тан олиш орқали ҳал қилиш мумкинлигини айтганди.
Изоҳ (0)