Россия ҳукумати Белгород вилояти ҳудудида 14 августдан бошлаб умумий фавқулодда ҳолат эълон қилган. Бу ҳақда “ТАСС” нашри хабар берди.
Ушбу қарорга келишга Курскдаги жангларнинг Белгородга кўчиш эҳтимоли сабаб бўлган. Расмийлар тезкор қарор чиқариб хавфсизлик хизматларини бўлинмаларини чегара ўтказиш пунктлари атрофига жойлаштиришни бошлаган.
Белгород раҳбарияти фавқулодда ҳолат фақат Белгороддагина эмас, балки бутун мамлакат миқёсида — федерал даражада ташкил этилиши кераклигини билдирган. Чунки чегарада йирик қўриқлаш кучлари йўқлиги боис Украина Курскдаги каби ҳужумни исталган бошқа бир вилоятда содир этиши мумкин.
“Кейинчалик биз ҳукумат комиссиясига федерал даражадаги фавқулодда ҳолат эълон қилишни сўраймиз. Вазиятдан келиб чиқиб барибир бу қарорга келишга мажбур бўламиз”, деган Белгород губернатори Вячеслав Гладков.
Россия расмийларига кўра, Белгород чегарасида ҳар куни ҳаво ҳужумлари кузатилмоқда. Чегара чизиғи яқинида ўқ узиш ҳолатлари кўпайган.
“Белгород вилоятидаги вазият ниҳоятда мураккаб ва таранглигича қолмоқда. Украина қуролли кучлари ҳар куни ўққа тутмоқда, уйлар вайрон бўлмоқда. Тинч аҳоли орасида қурбонлар бор. Шунинг учун бугундан бошлаб Белгород вилоятининг бутун ҳудуди аҳолини қўшимча ҳимоя қилиш ва қўллаб-қувватлаш мақсадида минтақавий даражадаги фавқулодда вазият ҳудуди деб эълон қилинади”, дейилади расмийлар хабарида.
Маълумот ўрнида, 9 август Украина ҳарбийлари Курск, Брянск ва Белгород вилоятларида аксилтеррор амалиёти ўтказилишини маълум қилган. Бунга жавобан бу уч вилоятда фавқулодда режим жорий қилишга қарор қилинган. Бунгача қўшни давлат ҳарбийлари Курскнинг жанубини эгаллаб олганди. Москванинг кескин қарши баёнотларига қарамай украин бўлинмаларининг Россия ҳудудида мавжудлиги сақланиб қолмоқда.
Изоҳ (0)