Давлат бюджети тақчиллиги ортишда давом этмоқда. Асосий кўрсаткичлар

Ўзбекистонда давлат бюджети тақчиллиги ўсишда давом этмоқда. Хусусан, жорий йилнинг январь–июнь ойларидаги бюджет дефицити 28,8 триллион сўмга етган.

Иқтисодиёт ва молия вазирлиги давлат бюджети даромадлари ҳамда харажатлари бўйича кунлик маълумотларни эълон қилиб келмоқда. Вазирлик ҳисоботига кўра, ҳар ойда бюджет харажатлари даромадлардан сезиларли даражада юқори шаклланмоқда. Хусусан, 2024 йил январда жами бюджет тушумлари 16,1 триллион сўмни, харажатлари 21,9 триллион сўмни ташкил этган.

Февралдаги даромадлар 16,9 триллион сўм, харажатлар 24,1 триллион сўм бўлган. Март ойидаги бюджет тушумлари 17,4 триллион сўм, харажатлар 24,3 триллион сўм, апрелдаги даромадлар 19,3 триллион сўм, чиқимлар 25 триллион сўмни ташкил этган.

Ўзбекистон бюджетига май ойидаги тушумлар миқдори 22,7 триллион сўмга, харажатлар 26,5 триллион сўмга етган. Июндаги даромадлар эса 23,2 триллион сўм, харажатлар 27,9 триллион сўм бўлган.

2024 йил I ярим йиллигида Ўзбекистон давлат бюджети даромадлари 2023 йилнинг мос даврига нисбатан 18,3 фоизга ошиб, 121 триллион сўмни ташкил ташкил этди. Шундан 80,6 фоизи солиқлардан, 19,4 фоизи солиқсиз тушумлар ва бошқа даромадлардан келган.

Ярим йил давомида давлат бюджети жами харажатлари 149,8 триллион сўм бўлган. Бюджет тақчиллиги миқдори қарийб 28,8 триллион сўмга етган. Харажатларнинг катта қисми (64,9 триллион сўми) иш ҳақи ва унга тенглаштирилган тўловларга ажратилган. Шу билан бирга, ижтимоий солиқларга 12,9 триллион сўм, газ нархидаги тафовут учун субсидияларга 9,3 триллион сўм сарфланган.

Ўтган июль ойи давомида давлат бюджетига 21,8 триллион сўмлик даромадлар келиб тушган. Харажатлар 24,3 триллион сўмни ташкил этиб, дефицит миқдори ўсишда давом этган.

Мамлакатда охирги тўрт йил давомида бюджет дефицити белгиланган лимитлардан ортиқ даражада шаклланиб келмоқда. Хусусан, 2023 йилда консолидациялашган бюджет тақчиллигининг чекланган миқдори 3 фоиз этиб белгиланган бўлса–да, амалда 5,5 фоизгача ўсган.

2024 йил консолидациялашган бюджети 52,6 триллион сўмлик дефицит билан қабул қабул қилинган ва мамлакат бюджети тақчиллигининг чекланган миқдорини ялпи ички маҳсулотнинг 4 фоизидан оширмаслик белгиланган.

Бюджет қонунида жорий йилда 5 миллиард доллар миқдорида давлат ташқи қарзини жалб қилиш кўзда тутилган. Шундан 2,5 миллиард доллари давлат бюджети тақчиллигини молиялаштиришга, қолган 2,5 миллиард доллари инвестиция лойиҳалари учун сарфланиши кўрсатилган.