Бокс бўйича Қозоғистон терма жамоаси барча мураббийларини истеъфога чиқардими?
Қозоғистон бокс федерацияси расмий саҳифасида хабар чиқди ва дарҳол ўчирилди. Унда федерация вице-президенти Азиз Кожамбетов ва бокс терма жамоасининг барча мураббийлари истеъфога чиқарилганини ёзилган эди, дея хабар беради Тенгри Спорт.
“Бокс бўйича Қозоғистон эркаклар терма жамоасининг Париждаги Олимпиада ўйинларида қониқарсиз натижалари туфайли қуйидаги мутахассислар ўз лавозимларидан озод этилганини эълон қиламиз: Қозоғистон бокс федерацияси вице-президенти Азиз Кожамбетов”, — деб ёзилганди ўчирилган хабарда.
Шунингдек, истеъфога чиқарилганлар орасида терма жамоа мураббийларининг тўлиқ таркиби ҳам келтирилганди:
Бош мураббий — Мирзагали Айтжанов, катта мураббий — Марат Жакиев, мураббий — Нуркен Андасов, мураббий Нуржан Насанов, мураббий — Гани Ашкеев, мураббий Эрмек Эртаев, мураббий — Талғатбек Жакпеков, мураббий — Закир Сафиулин, мураббий Азамат Макажанов, мураббий — Жамил Жусип, маслаҳатчи мураббий — Донатас Янюсявичус.
Ушбу хабар федерациянинг расмий саҳифасида бир неча сония турган ва дарҳол ўчирилган. Бироқ ижтимоий тармоқларда хабар скринлари тарқалган.
Федерация ушбу мутахассисларнинг ҳеч бири истеъфога чиқарилмаганини, лекин кейинчалик ўзгаришлари бўлишини маълум қилган.
“Ҳа, биз бу хабарни тасдиқламаймиз. Боксда ўзгаришлар бўлади, яқин орада ўз расмий саҳифаларимизда эълон қиламиз”, — дейилади федерация матбуот хизмати хабарида.
Аввалроқ Қозоғистон бокс федерацияси президенти Шаҳмурат Муталип ҳам ислоҳотлар тўғрисида гапириб ўтган. У Олимпия баҳслари терма жамоанинг хато ва камчиликларини кўрсатиб берганини таъкидлаган.
“Биз тўлиқ масъулиятни ўз зиммамизга оламиз ва баҳона қилишни истамаймиз. Барчамиз айбдормиз. Федерация ҳам, мураббийлар ҳам. Ҳаммамиз ўз хатоларимизни, камчиликларини кўриб, Қозоғистон бокс федерациясига катта ислоҳотлар керак, деган хулосага келдик”, — президентнинг сўзларидан иқтибос келтиради Орда кз.
Эслатиб ўтамиз, бокс бўйича Қозоғистон терма жамоаси Олимпиадада битта кумуш ва битта бронза медалини олишга муваффақ бўлди.
Изоҳ (0)