“Мария” тўфони туфайли Японияда поездлар қатнови тўхтатилди ва парвозлар бекор қилинди

“Мария” тропик бўрони Япониянинг Хонсю оролига етиб борди ва бу транспорт тизимида узилишларга сабаб бўлди, деб хабар бермоқда Япония ОАВ.

Хусусан, Тохоку вилоятидаги ноқулай об-ҳаво туфайли Мориока ва Акита бекатлари ўртасида поездлар қатнови чекланган. Japan Airlines ҳамда Аll Nippon Аirwаys авиакомпаниялари бир қатор рейсларни бекор қилди. Қайд этилишича, чекловлар сешанба куни эрталабгача давом этиши мумкин.

Табиий офат якшанба куни Ивате префектурасига етиб борди, у ерда сўнгги икки кун ичида 46 см гача ёмғир ёғди. Бундан ташқари, прогнозларга кўра, сешанба куни 25 см гача ёғингарчилик бўлиши кутилмоқда.

Аввалроқ “Мария” бўрон эмас, балки кучлироқ табиий офат —  тайфун сифатида таснифланган эди. 

Япония ҳукумати сув тошқинлари, сел ва кўчкилар хавфидан огоҳлантириб, Ивате, Аомори ва Мияги префектураларининг 170 минг аҳолисини уйларини тарк этишга ва махсус бошпаналарга жойлашишга чақирди.