АҚШ президентлигига Республикачилар партиясидан номзод Дональд Трамп ва Демократик партиядан Камала Ҳаррис 10 сентябрь куни дебат ўтказишга келишиб олди, дея Reuters хабар берди.
Учрашув уларнинг сайловолди пойгасидаги илк оғзаки беллашуви бўлиши кутилмоқда.
Ипсос сўровига кўра, июль ойи охиридан бери Камала Ҳаррис Американинг собиқ президентидан устунлигини 5 фоизга оширган. Тадқиқотга кўра, респондентларнинг 42 фоизи унга, 37 фоизи Трампга овоз беришга тайёр. Сайловчиларнинг яна 4 фоизи мустақил номзод Роберт Кеннедини қўллаб-қувватлаган. Шу билан бирга, ўртача сўров маълумотларига кўра, демократ республикачилардан ҳамон 0,5 фоизга олдинда.
Дональд Трамп Палм-Бичдаги (Техас штати) қароргоҳида ўтказилган матбуот анжуманида 4 ва 25 сентябрь кунлари тегишли равишда Fox News ва ABC News телеканалларида намойиш этиладиган қўшимча дебатлар ўтказишга тайёрлигини маълум қилган. Бироқ, Ҳарриснинг сайловолди ташвиқоти вакили, Fox телеканалида 4 сентябрь куни бўлиб ўтган дебат муҳокама қилинмаётганини маълум қилган. Ҳаррисга кўра, қўшимча раундлар бўйича муҳокамалар 10 сентябрдаги йиғилишдан кейин бошланади.
АҚШда сайловлар 5 ноябрга белгиланган. 21 июль куни АҚШнинг амалдаги президенти Жо Байден ўз номзодини президентлик пойгасидан олиб ташлаш қарорини эълон қилган эди. Бунинг эвазига у Демократик партиядан Камала Ҳаррис номзодини илгари суришни таклиф қилган. Ҳаррис сайловолди кампанияси бир ҳафтада 200 миллион доллар хайрия йиғишга муваффақ бўлган. 7 август куни у президентлик сайловларида Демократик партиянинг расмий номзоди сифатида тасдиқланган.
Изоҳ (0)