Ўзбекистонга 6 ойда туристик мақсадларда Буюк Британиядан 9 минг нафар фуқаро келган.
Статистика агентлиги маълумотларига кўра, бу кўрсаткич 2023 йилнинг мос даври билан солиштирилганда 2,3 минг нафарга ёки 34,5 фоизга ошган.
2024 йилнинг январь—июнь ойларида Ўзбекистонга туристик мақсадларда келган Буюк Британия фуқаролари сафар мақсадлари кесимида қуйидагича:
- дам олиш — 7 370 нафар;
- қариндошларни йўқлаш — 862 нафар;
- хизмат юзасидан — 679 нафар;
- тижорат — 32 нафар;
- ўқиш — 31 нафар;
- даволаниш — 2 нафар.
Май ойида Ўзбекистон элчиси Равшан Усманов Британиянинг етакчи сайёҳлик компанияси Explore Worldwide директори Саймон Гроув билан Буюк Британиядан сайёҳларни Ўзбекистонга кенг жалб этиш ва 2024 йилда улар учун мамлакатни жозибадор йўналиш сифатида таништириш масалаларини муҳокама қилганди.
“Ўзбекистон кейинги йилларда хорижлик, хусусан британиялик сайёҳлар орасида кенг оммалашди. Биз британиялик сайёҳларни Ўзбекистонга қизиқишини янада ошириш учун компания сайтининг манзиллар бўлимида Ўзбекистон учун алоҳида рукн очдик”, деган эди Саймон Гроув.
Агентлик берган маълумотларга кўра, Ўзбекистонга 2024 йилнинг биринчи ярмида 3,5 миллиондан ортиқ чет эл фуқаролари туристик мақсадда ташриф буюрди. Ушбу кўрсаткич ўтган йилнинг мос даври билан солиштирилганда 415,6 минг нафарга ёки 13,3 фоизга ошган.
Изоҳ (0)