Пора олаётганида ушланган Когон тумани прокурори Баҳодир Ғуломов 15 йилга озодликдан маҳрум этилди.
Жиноят ишлари бўйича Самарқанд шаҳар судида 2 август куни унга тегишли жиноят иши кўриб чиқилган. “Дарё” танишиб чиққан суд ҳужжатига кўра, Баҳодир Ғуломов Когон тумани прокурори лавозимида ишлаб келиб фирибгарлик йўли билан ўзганинг жуда кўп миқдордаги пул маблағларини қўлга киритиш мақсадида 2024 йил январь ойи бошларида Н.Нўмонов ва хавфли рецидивист бўлган З.Адилов билан жиноий тил бириктирган.
Улар Бухоро вилоят прокуратураси ўта оғир жиноятларни тергов қилиш бўлими томонидан тергов ҳаракатлари олиб борилаётган “Когон ёғ-экстракция заводи” АЖ мансабдор шахсларига нисбатан жиноят иши бўйича жамият таъсисчиларидан бирининг ишончига кириб, жиноят иши доирасида унга нисбатан айблов эълон қилмаслик ва жиноий жавобгарлик масаласини Бухоро вилоят прокуратурасида ишловчи мансабдор шахслар орқали ҳал этиши мумкинлигини айтиб, 100 минг доллар миқдорида пора беришга далолат қилган.
Баҳодир Ғуломов 15 январь куни Бухоро шаҳридаги “Турон” меҳмонхонаси олдида 100 минг долларни жиноий шериги Н.Нўмонов орқали олган. Шунингдек, у жиноий ҳаракатларини давом эттириб, “Когон ёғ-экстракция заводи” АЖга алоқадор шахсларни Бухоро вилоят прокуратурасида ишловчи мансабдор шахслар орқали терговга жалб қилмаслик ва жиноий жавобгарликка тортмаслик эвазига яна 100 минг доллар пора беришга далолат қилган ҳамда фирибгарлик йўли билан 44 минг долларни қўлга киритган.
Шундан 10 минг долларни З.Адилов олиб, қолган 34 минг долларни Н.Нўмонов келгусида Баҳодир Ғуломовга бериш учун ўзида сақлаб келган. 13 февраль куни Бухоро шаҳар марказий касалхонаси ёнида ўтказилган тезкор тадбирда Баҳодир Ғуломов Н.Нўмонов орқали 56 минг долларни олган вақтида далилий ашёлар билан ушланган.
Суд ҳукми билан Баҳодир Ғуломов Жиноят кодексининг 168-моддаси 4-қисми “а” банди (жуда кўп миқдорда фирибгарлик), 28, 211-моддаси 3-қисми “а” бандида (жуда кўп миқдорда пора беришда иштирокчилик) назарда тутилган жиноятларни содир этганликда айбли деб топилган.
Унга 3 йил муддатга прокуратура органлари тизимида ишлаш ҳуқуқидан маҳрум қилган ҳолда 15 йилга озодликдан маҳрум қилиш жазоси тайинланган. Шунингдек, унинг шериклари — Н.Нўмонов 11 йил, хавфли рецидивист ҳисобланган З.Адиловга 12 йилга озодликдан маҳрум қилиш жазоси берилган.
Президент февраль ойида Андижонда бўлиб ўтган йиғилишда “секин-секин 200 минг долларни гаплашган” Когон тумани прокурори қилмишини танқид қилиб, уни ноинсоф деб айтганди.
Аввалроқ Асака туман прокурори ўринбосари 8 йил 6 ой муддатга озодликдан маҳрум қилингани ҳақида хабар берилган эди.
Пора билан қўлга тушган прокуратура ходимлари
Апрель ойида Қарши тумани прокуратураси терговчиси иш юритувидаги жиноят иши бўйича айбдор шахсга нисбатан енгиллик қилиб бериш эвазига 5 минг доллар пора билан ушланганди. Июнь ойида эса Сурхондарё вилояти прокуратураси бўлим катта прокурори 10 минг доллар пора олаётганида қўлга тушди.
Изоҳ (0)