Офис ходимларига хавф соладиган бўйин остеохондрози белгилари ва уни даволаш чоралари

Ҳар йили Ер юзида камҳаракатликдан 5 миллиондан ортиқ одам ҳаётдан кўз юмади. Чунки кун давомида офисда ўтириб ишлаш ва жисмоний машғулотлар билан шуғулланмаслик организмда турли касалликларнинг ривожланишига замин яратади. Улардан бири бўйин остеохондрозидир.

Остеохондроз — бу умуртқалар, уларнинг тоғайсимон дисклари ва бойламларини дегенератив-дистрофик ўзгаришлари бўлиб, улардан бўйин остеохондрози кенг тарқалгандир. Ушбу муаммо 35 ёшдан ошган одамларнинг 40-85% ида кузатилади. Қуйида бўйин остеохондрозининг асосий белгилари ва даволаш усулларини кўриб чиқамиз.

Маълумки, бўйин умуртқа поғонасининг энг ҳаракатчан қисми. Ундан бир қанча асаб томирлари ва умуртқа артерияси ўтади. Унинг вазифаси орқа мия қон томирлари ва узунчоқ мияни қон билан таъминлашдан иборат. Агар остеохондроз сабабли умуртқа артерияси босилса, беморда бел ва бош мия ишемияси кузатилиши эҳтимоли бор. Шу сабабли ушбу касалликка эътиборсиз бўлиш ярамайди.

Бўйин остеохондрози бор инсонда бош соҳасида кучли ва давомли оғриқ, бош айланиши, кўз хиралашиши, қўл бармоқларида санчиқлар, ҳолсизлик, ҳансираш, артериал қон босимининг ўйнаши каби белгилар кузатилиши мумкин. Бош ва бўйин қисмида юзага келган оғриқлар уларни қолдирувчи воситалар қабулидан кейин ўтиб кетади. Касаллик бир нечта босқичда кечади:

1. Биринчи босқич: агар бемор узоқ вақт давомида бир ҳолатда қолса, бош ҳеч қандай сабабсиз тўсатдан оғрий бошлайди. Қонда кислород етишмаслиги туфайли томирларда спазмлар ҳосил бўлади. Вақт ўтиши билан дам олиш ва бош массажи орқали оғриқ қолади.
2. Иккинчи босқич: бош оғриғи тез-тез безовта қилади, гўё бошни ҳар томондан қисиб, босгандек туюлади. Ушбу белги бош айланиши, кўнгил айниши, эшитиш, кўриш ва бошқа ҳисларнинг қисман йўқолиши билан бирга келиши мумкин.
3. Учинчи босқич: бош оғриғи сурункали тус олади, мия яхши ишламайди. Оғриқ қолдирувчи дори воситаларини қабул қилгандан кейин бир муддат ўтиб кетади, аммо яна қайталанади. Бундай вақтда кўплаб беморлар шифокорга мурожаат қилишга мажбур бўлади.

Бўйин остеохондрозини даволаш: ишни нимадан бошлаш керак?

Бугунги кунда замонавий тиббиёт кўплаб турдаги фармацевтик воситалар ёрдамида остеохондрознинг барча турини даволаш имкониятини беради. Бўйин остеохондрози туфайли вужудга келадиган оғриқларни камайтириш учун уй шароитида қуйидаги машқларни бажариш мумкин:

• Оддий қалам билан бўйиннинг иккита ён қисмини уқаланг. Бу машқ қон оқимини яхшилайди;
• Елка қисмида бадантарбия бажаринг — қўлларнинг айланма ҳаракатлари билан елкани олдинга ва орқага силжитинг ва шу тариқа 10-20 сония ушлаб туринг;
• Қўлларни пешонага қўйинг ва устидан босинг, бошни ҳам қўлларга қарата босинг. Худди шундай ҳаракатни бошнинг орқа томони билан ҳам бажаринг;
• Ўнг қўлингизни чап чаккангиз устидан ўтказинг ва бошингизни чапга тортинг, кафтларингиз билан бошни ушлаб туринг. Худди шундай ҳаракатни ўнг томон билан ҳам бажаринг.

Унутманг, бундай машқлар остеохондрозни тўлиқ даволамайди ва касаллик албатта шифокор назорати ва тавсиялари асосида даволаниши зарур.