Самарқандда 1 млрд сўмлик электр энергиясидан ноқонуний фойдаланган МЧЖ мансабдорлари ушланди

Самарқанд вилояти Булунғур туманида электр энергиясидан ноқонуний фойдаланиб келган МЧЖ аниқланди, деб хабар беради Бош прокуратура матбуот хизмати.

Қайд этилишича, ёқилғи-энергия ресурсларидан фойдаланиш устидан давлат назоратини самарали ташкил этиш ва мувофиқлаштириш бўйича республика ҳамда ҳудудий штаблар томонидан энергия ресурсларни талон-торож қилинишининг фош этишга қаратилган назорат тадбирлари давом этмоқда.

Хусусан, Булунғур туманидаги “Б.Б.Г.” МЧЖ мансабдор шахслари жамиятга қарашли ғишт ишлаб чиқариш заводидаги ускуналарни ўзбошимчалик билан электр тармоғига улаб, 1 миллиард сўмлик 1,145 миллион кВт/соат электр энергиясини ўғирлаган.

Мазкур ҳолат юзасидан “Б.Б.Г.” МЧЖ мансабдор шахсларига нисбатан Жиноят кодексининг 169-моддаси 4-қисми (ўғрилик) “а” банди билан жиноят иши қўзғатилиб, гумонланувчи шахс процессуал тартибда ушланган.

Апрель бошларида Сурхондарё вилоятининг Денов, Қашқадарё вилоятининг Муборак ҳамда Фарғона вилоятининг Марғилон шаҳрида газдан ноқонуний фойдаланиш ҳолатлари фош этилган, Андижонда 1,3 млрд сўмлик электр энергиясидан ноқонуний фойдаланган ишлаб чиқариш цехи аниқлангани тўғрисида хабар берилган эди.

“Ўзэнергоинспекция”га кўра, Ўзбекистонда сўнгги бир ойда энергия ресурсларидан ноқонуний фойдаланишлар натижасида давлат манфаатларига 234 миллиард 778 миллион сўмлик зарар етказилган.