Испаниялик сузиш бўйича мураббий Серхио Лопес Париждаги Олимпия шаҳарчасидаги яшаш шароитлари ҳақида фикр билдирди.
“Олимпия қишлоғи тартибсиз. Аввалига овқат йўқ эди. Дейлик, товуқ тугаб қолса, улар сизга йўқлигини айтишмайди, лекин яна келтиришмайди ҳам. Улар товуқ тугаганини айтишдан қўрқади. Исландиядалик сузувчи кир ювиш учун соат 9:30 да кетди, унга бу пайтда буни қила олмаслигини, бошқа бинога боришини айтишди. Айтилган бинога борганда эшик ёпиқ эди. Одамлар терлайди ва тоза кийимга муҳтож.
Транспорт хизмати ҳам жуда ёмон. Ҳаво жуда иссиқ, автобуслар кондиционерсиз. 30 дақиқалик манзилга бир ярим соатда етиб бордик. Ҳайдовчи адашиб қолди. Гаров боғлашим мумкин, ҳайдовчилар Париждан эмас. Одамлар автобус полида ўтиришди. Ўриндиқлар сони етарли эмас эди. Матбуот бу ҳақда гапирмайди. Мен французлар ўз ғурури учун мусобақани юқори савияда ўтказишини кутгандим”, дея испанияликнинг сўзларини келтиради Relevo.
55 ёшли Лопес 1988 йилда Сеулда (Жанубий Корея) бўлиб ўтган Олимпиаданинг 200 м масофага брасс усулида сузиш бўйича бронза медали совриндори ҳисобланади. У спортчи ва мураббий сифатида еттита ёзги Олимпия ўйинларида қатнашган.
Изоҳ (0)