Эрон Исроилга ҳужум қилишга қарор қилди ва бу ҳақда Венгрия ТИВ раҳбари Петер Сиярто орқали хабар юборди, дея The Jerusalem Post маълум қилди.
Хабарга кўра, Сиярто Исроил ТИВ раҳбари Исроил Кацга қўнғироқ қилган ва унга ушбу маълумотни Эрон ТИВ раҳбари вазифасини бажарувчи Али Багери Кани билан суҳбат чоғида олганини тушунтирган.
“Дунё Эрондан ҳар қандай тажовузкор ҳаракатлари учун товон талаб қилиши керак”, дея таъкидлаган Кац.
Исроиллик вазир бошқа ҳеч қандай маълумот бермаган.
Эрон 31 июлга ўтар кечаси Теҳронда ҲАМАС сиёсий бюроси раҳбари Исмоил Ҳаниянинг ўлдирилишига жавобан Исроилга зарба беришни режалаштирмоқда. Исроил томони ҳодиса юзасидан расман жавобгарликни ўз зиммасига олмаган.
Аввалроқ WSJ нашри урушга олиб келса ҳам, Эрон Исроилдан қасос олишга ваъда бергани ҳақида хабар қилганди. Қайд этилишича, Эрон расмийлари араб дипломатларига жавоб зарбаси урушга олиб келиши улар учун аҳамиятсиз эканини айтган.
WSJ маълумотларига кўра, Қўшма Штатлар Европа ва бошқа ҳукуматлардан Эронга эскалацияга қарши хабар юборишни ва ҳар қандай жиддий ҳужум жавоб чораларига олиб келиши ҳақида огоҳлантиришни сўраган. Бундан ташқари, Вашингтон Эрон янги президентининг Ғарб билан алоқаларини яхшилашга қаратилган саъй-ҳаракатлари, агар Эрон вазминлик кўрсаца, кўпроқ имкониятга эга бўлишига ишора қилган.
Изоҳ (0)