АҚШда фонд бозори “қуламоқда”. Трамп бунда мамлакат раҳбариятини айблади

АҚШда фонд бозори “қуламоқда”. Бугун савдолар очилганидан кейин 15 дақиқа ўтар-ўтмас фонд бозори деярли 2 триллион доллар йўқотди.

АҚШ собиқ президенти Дональд Трамп фонд бозорларининг қулашини Камала Ҳаррис ва Жо Байденнинг қобилиятсизлиги билан боғлади. У Truth Social ижтимоий тармоғида уларни “ноқобил” деб атади.

“Қимматли қоғозлар бозори қуламоқда. Мен сизга айтгандим!!! Камала ҳеч нарсани тушунмайди. Байден чуқур уйқуда. Буларнинг барчаси Қўшма Штатларнинг нодон раҳбарияти туфайли!” деб ёзди собиқ президент.

Бугун, 5 август куни Осиё бозорлари биржа индексларининг тарихий пасайишига дуч келди. Япония фонд биржаларида Nikkei ва Тоpiх 1987 йилдаги “Қора душанба”дан бери рекорд даражадаги пасайиш 13,4 фоиз ва 12,23 фоизни қайд этди, деб ёзади CNBC.

Жанубий Кореянинг КОSPI индекси 2008 йилдаги инқироздан бери биринчи марта 8,8 фоизга пасайиш билан ёпилди, дея хабар беради Reuters.

Осиё бозорларидаги қулаш акцияларнинг сотилиши билан боғлиқ бўлиб, бунга Япония Марказий банки асосий ставкасининг ошиши ва АҚШда рецессия кутилиши сабаб бўлиши мумкин. Goldman Sachs инвестиция банки иқтисодчилари 4 август, якшанба куни рецессия эҳтимолини 25 фоизга баҳолади, деб хабар беради Bloomberg.

АҚШда савдолар очилишида Dоw Jones индекси 1000 пунктдан ортиқ 3 фоизга, Nasdaq юқори технологияли индекси эса 6 фоизга ёки 800 пунктга тушиб кетди.