Самарқанд вилоят суди Иқтисодий ишлар бўйича судлов ҳайъатининг тафтиш инстанцияси МИБнинг Нишон туман бўлими тракторини ноқонуний олиб қўйиб, 49 кун давомида жарима майдонида сақлаши оқибатида фермерга 355 миллион сўм зарар етказгани билан боғлиқ ҳолатни кўриб чиқаётгани хабар берилганди. Суднинг, 1 август куни давом этган навбатдаги мажлисида фермер фойдасига МИБнинг Нишон тумани бўлимидан 44 миллион сўм йўқотилган соф фойдани ундириш ҳақида қарор чиқарилди.
Самарқанд вилоят суди Иқтисодий ишлар бўйича судлов ҳайъатининг тафтиш инстанцияси судлов ҳайъати Қарши туманлараро иқтисодий судининг 2024 йил 5 февралдаги ҳал қилув қарори ва Қашқадарё вилоят судининг Иқтисодий ишлар бўйича судлов ҳайъати апелляция инстанциясининг 2024 йил 18 апрелдаги қарорини бекор қилди.
Фермер-деҳқон хўжаликлари ва томорқа ер эгалари Нишон тумани кенгашининг тафтиш шикояти қисман қаноатлантирилсин. Янги қарор қабул қилинсин. МИБнинг Нишон тумани бўлимидан “Самандар нур” фермер хўжалиги фойдасига 44 миллион 412 минг сўм бой берилган фойда ундирилсин. Даъво талабининг қолган қисмларини қаноатлантириш рад қилинсин, дейилади судлов ҳайъати қарорида.
Шунингдек, судлов ҳайъати ишни кўриш жараёнида фермерга МИБ ходимларининг хатти-ҳаракати сабаб зарар етказилган деган қарорга келди. Ва бу ҳақда МИБнинг Қашқадарё вилоят бошқармасига хусусий ажрим юборилишини маълум қилди.
Даъвогар манфаатини ҳимоя қилган Қашқадарё вилоят Фермер-деҳқон хўжаликлари ва томорқа ер эгалари кенгашининг ҳуқуқий масалалар ҳамда фермер деҳқон хўжаликлари ва томорқа ер эгалари ҳуқуқларини ҳимоя қилиш бўйича бош мутахассиси Тўлқин Шоимовнинг “Дарё”га қўшимча қилишича, эндиликда фермерга етказилган зарарни қоплаш бўйича ҳам судга шикоят киритилади.
Бой берилган сой фойдани ундирдик. Шунингдек, МИБ ходимларининг хатти-ҳаракати ноқонуний экани ва уларнинг ҳаракати оқибатида фермерга зарар етгани тасдиқланди. Қашқадарё вилоят Фермер-деҳқон хўжаликлари ва томорқа ер эгалари кенгаши эндиликда фермерга етказилган зарарни қоплаш бўйича судга шикоят қилиб, “Самандар нур” фермер хўжалигини қўллаб-қувватлашда давом этади, дейди Тўлқин Шоимов.
Суднинг аввалги мажлисларида бизнес-омбудсман девонининг Қашқадарё вилоятидаги вакили Исмоил Сайитов МИБ ижрочиларининг хатти-ҳаракатида қонунга зидлик борлигини айтиб, улар шунингдек, мансаб ваколатларини ҳам суиистеъмол қилганини таъкидлади. Суддан жиноий иш қўзғатиш тўғрисида прокуратурага хусусий ажрим чиқаришни сўраганди.
Изоҳ (0)