Lufthansa Эрон ва Ироқ ҳаво ҳудуди орқали парвозларни тўхтатди

Германиянинг Lufthansa авиакомпанияси самолётлари Яқин Шарқдаги вазият кескинлашгани сабабли 7 августга қадар Эрон ва Ироқ ҳаво ҳудудини четлаб ўтади, деб хабар бермоқда Ғарб ОАВ компания баёнотига таяниб.

Шунингдек, Lufthansa авиакомпанияси Иордания пойтахти Умман ва Ироқнинг Арбил шаҳрига парвозларини ҳам 7 августгача тўхтатди.

Бундан ташқари, Swiss International Airlines, Austrian Airlines вa Eurowings компанияларини ўз ичига олган Lufthansa гуруҳи Тель-Авив, Теҳрон ва Байрутга парвозларни 12 августгача тўхтатганини эълон қилди.
Аввалроқ мазкур авиакомпания яқин орадаги Исроилга бўлган барча рейсларни бекор қилган эди.

Яқин Шарқдаги вазият ўтган ҳафта Теҳронда ҲАМАС сиёсий бюроси раҳбари Исмоил Ҳания ва “Ҳизбуллоҳ” етакчиси Ҳасан Насруллоҳнинг катта маслаҳатчиси Байрутда ўлдирилганидан кейин кескин ёмонлашди. Эрон ва “Ҳизбуллоҳ” уларнинг ўлими учун қасос олишга ваъда берди.