Исроил мудофаа кучлари ҳужумларда ҳалок бўлган 84 нафар фаластинлик жасадини Ғазога қайтарди. Бу ҳақда Reuters нашри хабар берди.
Манбада айтилишича, жасадлари топширилган фаластинликлар Исроилнинг қуруқлик ҳужумида ўлдирилган. Жасадларни аксарияти вайроналар остидан олиб чиқилиб, қопларга солинган ҳамда анклав ҳудудига юборилган.
Ғазо жанубидаги Хон Юнис шаҳри фавқулодда вазиятлар хизмати директори Ямaн Абу Сулаймон жасадлар қабул қилинганини тасдиқлаган. Ҳозирда тиббиёт ходимлари иштирокида ўлим сабаблар аниқланаётгани айтилган.
“Босқинчилар бизга ҳалок бўлганларнинг исми, уларнинг ёши ва бошқа маълумотларни бермади. Биз ўлдирилганлар кимлигини ҳатто билмаймиз ҳам. Бу уруш жинояти, инсониятга қарши улкан жиноят”, деган Абу Сулаймон ҳолатга муносабат билдириб.
84 та жасад 15 дан ортиқ қопларга солиб Ғазога юборилган. Эндиликда бу жасадлар Хон Юнис шаҳридаги Носир касалхонаси яқинидаги оммавий қабристонга дафн қилиниши белгиланган.
Фаластиндаги кўплаб инсон ҳуқуқлари ташкилотлари Исроилнинг хатти-ҳаракатларини қоралаган. Тель-Авив ҳарбийларидан жасадлар шахси ҳақидаги маълумотлар топширилиши талаб қилинган.
Изоҳ (0)