Хоразмда ИИБга ишга киритиб қўйиш учун 6 минг доллар сўраган ДУК мутахассиси ушланди (видео)

Давлат хавфсизлик хизмати ходимлари томонидан ҳудудларда коррупция ва фирибгарлик билан боғлиқ ҳолатларга чек қўйилди.

Хусусан, ДХХ ходимлари томонидан Иқтисодий жиноятларга қарши курашиш департаменти билан ҳамкорликда ўтказилган тезкор тадбирда “Ўрта Чирчиқ тумангаз” газ таъминоти бош муҳандиси нон маҳсулотлари ишлаб чиқарилиши режалаштирилган бинони газ тармоғига улаб бериш, техник ҳужжатларни расмийлаштириш, ҳисоблагич ўрнатиш, газ қувурларини тортиш ва бошқа ишларни қилиб бериш эвазига 8,5 минг доллар олган вақтида ашёвий далиллар билан ушланган.

“Хазорасп эркин иқтисодий зона дирексияси” давлат унитар корхонаси мутахассиси Қўшкўпир туманида истиқомат қилувчи фуқаронинг ишончига кириб, уни ўзининг мансабдор танишлари орқали Хоразм вилояти Ички ишлар бошқармасига ишга киритиб қўйишини айтиб, эвазига 6 минг доллари талаб қилган.

Хизматнинг Хоразм вилояти бўйича бошқармаси ходимлари томонидан Иқтисодий жиноятларга қарши курашиш департаментининг ҳудудий бошқармаси билан ҳамкорликда ўтказилган тезкор тадбирда ушбу мутахассис 3,5 минг доллар олган вақтида ушланган.

Савдо-саноат палатасининг Хоразм вилоят ҳудудий бошқармаси Боғот тумани бўлими мансабдор шахси юқори лавозимда ишловчи танишлари орқали Урганч шаҳрида истиқомат қилувчи фуқаронинг ерга бўлган эгалик ҳуқуқини қайта тиклаб бериш эвазига 3 минг доллар талаб қилиб, шундан 400 доллар ҳамда 1,2 миллион сўм олган вақтида Хизматнинг Хоразм вилояти бўйича бошқармаси ва департамент ходимлари томонидан ашёвий далиллар билан қўлга олинган.

Давлат хавфсизлик хизматининг Қашқадарё вилояти бўйича бошқармаси ходимлари томонидан Бош прокуратура ҳузуридаги департаментнинг ҳудудий бошқармаси билан ҳамкорликда ўтказилган тезкор тадбирда Чироқчи туман тиббиёт бирлашмаси бошлиғи вазифасини бажарувчиси ўз мансаб ваколатидан фойдаланган ҳолда икки нафар фуқарони мазкур бирлашмага ишга қабул қилиш эвазига 1,5 минг доллар олган вақтида ашёвий далиллар билан ушланган.

Самарқанд шаҳрида ўтказилган тезкор тадбирда эса автотранспорт воситалари эҳтиёт қисмлари савдоси билан шуғулланувчи МЧЖнинг божхона расмийлаштируви бўйича мутахассиси маҳаллий тадбиркор томонидан 2024 йилнинг июнь ойида Туркия давлатидан олиб келинган қиймати 850 миллион сўмлик товар моддий бойликлар учун тўланиши лозим бўлган давлат божларини божхона идораларидаги танишлари орқали тез ва арзон нархларда божхона юк декларациясини расмийлаштириб берганлиги эвазига 1300 доллар талаб қилиб, шундан 1100 долларни олган вақтида ушланган.

Шунингдек, мазкур ишга алоқадор бўлган, Самарқанд вилоят божхона бошқармасига қарашли божхона постларидан бирининг бошлиғи ҳам 200 доллар олган вақтида ашёвий далиллар билан қўлга тушган.

Ҳозирда мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.