Ўзбекистонда 2024/2025-ўқув йилида мактабларда ўқувчилар учун мажбурий форма жорий этилмайди. Бу ҳақда Мактабгача ва мактаб таълими вазирлиги бошқарма бошлиғи Азамат Камолов маълум қилди.
Мамлакатда 2018 йил ҳукумат томонидан ягона мактаб формалари намуналари тасдиқланган эди. 2018/2019-ўқув йилидан бошлаб ўқувчилар уни ихтиёрий тартибда кийишга ҳақли экани белгилаб қўйилган. Мактаб формалари мажбурий бўладиган сана 2019/2020-ўқув йилидан 2024/2025-ўқув йилига – 5 йилга кечиктирилганди. Вазирлар Маҳкамасининг қарорига тегишли тузатишлар киритилган бўлиб, ягона мактаб формаси 2025 йилга қадар босқичма-босқич жорий этиб борилиши белгиланган.
“Ҳар йили ҳар бир мактаб томонидан ўз низоми бўйича белгиланган форма танлаб олинади. Ҳозирга қадар ўқувчилар учун айни бир хил форма кийилсин, деган қаттиқ талаб қўйилмади. Демак, жорий йилда ҳам мактабларда мажбурий форма жорий этилмайди”, дейди Азамат Камолов.
Унинг сўзларига кўра, ўқувчилар учун “Умумий ўрта таълим муассасасининг такомиллаштирилган намунавий одоб-ахлоқ қоидалари”га мувофиқ, ўқувчиларнинг таълим муассасаси уставида ман этилган либос ва қиёфада, жумладан, ўғил болалар калта шим, футболка, шиппакда ва қизлар тор ва танани очиқ кўрсатувчи юпқа, ҳарир кийимларда келиши ҳамда бўйни ва бармоқларига турли тақинчоқлар тақиши ман этилади.
Изоҳ (0)