Нукус давлат педагогика институтига ноқонуний йўллар билан ўқишга киритиб қўйишни ваъда қилган шахслар ушланди, деб хабар беради Бош прокуратура ҳузуридаги департамент.
Қайд этилишича, департаментнинг Хоразм вилоят бошқармаси ва Ҳазорасп тумани бўлими томонидан ИИБ ходимлари ҳамкорлигида тезкор тадбир ўтказилган. Тадбирда Г.Х. ва Ч.Р. исмли шахслар фуқаро Х.Б.ни танишлари ёрдамида Нукус давлат педагогика институтининг мактабгача таълим йўналиши бўйича ўқишга киритиб қўйиши эвазига 2 750 долларни олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Тошкент кимё халқаро университетининг Самарқанд филиалига ўқишга киритиб қўйишни ваъда қилган шахс ушлангани тўғрисида хабар берилганди.
Изоҳ (0)