Буюк Британия Ташқи ишлар вазирлиги Яқин Шарқ минтақасида кескинлик кучайганлиги сабабли Ливандаги Британия фуқаролари мамлакатни тезда тарк этишлари кераклигини айтди.
“Ҳукумат Ливанга саёҳат қилмасликни маслаҳат беришда давом этмоқда ва ҳали ҳам Ливан ҳудудидаги британияликларга йўловчи рейслари мавжуд бўлган пайтда мамлакатни зудлик билан тарк этишни маслаҳат беради”, дейилади Британия Ташқи ишлар вазирлиги баёнотида.
“Танглик юқори даражага етди ва вазият тезда ёмонлашиши мумкин. Биз Ливандаги мавжудлигимизни консуллик даражасида кучайтириш учун кеча-ю кундуз ишлаяпмиз. Айтиш жоизки, менинг Ливандаги инглизларга мурожаатим: зудлик билан мамлакатни тарк этинг”, дейди Британия ташқи ишлар вазири.
“Можаронинг кенгайиши ҳеч ким учун фойдали эмас. Бундай можаронинг оқибатлари ҳалокатли бўлиши мумкин, шунинг учун биз вазиятни тинчлантириш ва дипломатик йўл билан ҳал қилишга чақиришда давом этамиз”, дея қўшимча қилди вазир.
Июль ойи охирида Теҳронда Фаластиннинг ҲАМАС ҳаракати Сиёсий бюроси раҳбари Исмоил Ҳания ўлдирилган эди. Теҳрон қотилликда Исроилни айблади. Исроил томони бу айбловларга изоҳ бермади. Бундан ташқари, июль ойида Байрутда Ливаннинг Эронга яқин бўлган “Ҳизбуллоҳ” гуруҳининг ҳарбий етакчиларидан бири Фуад Шукр Исроилнинг зарбаси натижасида ўлдирилган эди.
Эрон расмийлари бу ҳужумларни жавобсиз қолдирмасликка ваъда берди. Шундан сўнг қатор давлатлар Эрон Ливан, Ироқ ва Ямандаги иттифоқчи гуруҳлар билан биргаликда Исроилга қарши жавоб зарбаларини тайёрламоқда, деган хавотир билдирди.
Изоҳ (0)