Хитой шимоли-ғарбидаги Шэньси провинциясидаги кўприк қулаши оқибатида камида 38 киши ҳалок бўлди, яна 24 киши бедарак йўқолди. Бу ҳақда Хитой марказий телевидениеси маълум қилди.
Унда айтилишича, фавқулодда ҳолат Шанло шаҳридаги автомобиль йўлида содир бўлган. Дастлабки ҳисоб-китобларга кўра, 25 та автомобиль дарёга тушиб кетган.
Икки ҳафтадан бери давом этаётган қидирув-қутқарув операциясини амалга ошириш учун расмийлар 3 мингдан ортиқ одамни сафарбар қилган. Дронлар, сувости роботлари ва бошқа профессионал жиҳозлардан фойдаланилган.
Қайд этилганидек, бедарак йўқолганларни қидириш давом этмоқда. Тоғли ландшафт ва дарёнинг тез оқими, шунингдек, қўшни сув омборда лой тўпланиши қидирув ишларини мураккаблаштирмоқда.
Изоҳ (0)